ماجىلىستە "قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسى تانىستىرىلدى، دەپ حابارلادى ءماجىلىستىڭ باسپا ءسوز قىزمەتى.

زاڭ جوباسىن تانىستىرعان ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ جوبا بىرنەشە ماسەلەنى قامتيتىنىن ايتتى.

الدىمەن 1-توپتاعى مۇگەدەكتىگى بار ادامدارعا كۇتىم جاسايتىن ادامدارعا جاردەماقى ەنگىزۋ جوسپارلانىپ وتىر. جاردەماقى مولشەرى 48 مىڭ تەڭگە. مۇنىمەن 24 مىڭنان استام ادامدى قامتۋ كوزدەلۋدە.

سونداي-اق ءومىر ءسۇرۋ مەن دەنساۋلىق شەكتەلۋىنىڭ حالىقارالىق سىنىپتاماسىنا سايكەس 7 جاستان 16 جاسقا دەيىنگى بالالار مۇگەدەكتىك توپتار بويىنشا بولىنبەك. وسى ارقىلى سىرقاتتىڭ اۋىرلىق دارەجەسىنە بايلانىستى جاردەماقى مولشەرى سارالانعان تۇردە بەلگىلەنەدى. بۇل رەتتە، بالانىڭ دەنە فۋنكسياسىنىڭ بۇزىلۋى ءارتۇرلى دارەجەدە بولۋى مۇمكىن: ورتاشا، ايقىن نەمەسە وتە ايقىن. جاڭا نورماعا ساي، مۇگەدەك بالالاردى 7 جاستان باستاپ مۇگەدەكتىك توپتارى بويىنشا 1، 2 جانە 3 توپتاعى مۇگەدەك بالا دەپ ءبولۋ ۇسىنىلۋدا. نورما 31 مىڭنان استام مۇگەدەك بالاعا قاتىستى.

مۇگەدەكتىك توپتارى بويىنشا جارتەماقى تولەۋ ءتارتىبى تومەندەگىدەي بولماق:

- 1 توپتاعى 7 جاستان 16 جاسقا دەيىنگى مۇگەدەك بالاعا 65 860 تەڭگە؛

- 7 جاستان 16 جاسقا دەيىنگى 2 توپتاعى مۇگەدەك بالاعا 54 541 تەڭگە؛

- 7 جاستان 16 جاسقا دەيىنگى 3 توپتاعى مۇگەدەك 48 023 تەڭگە. 

زاڭ جوباسىنداعى كەزەكتى جاڭالىق مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا جاردەماقىلاردى بىردەي الۋ قۇقىعىن تاعايىنداۋ.

اتالعان نورما ەنگىزىلگەن كەزدە 2 مىڭنان استام بالا مۇگەدەكتىگى بويىنشا جاردەماقىمەن قوسا (مولشەرى 41 163 تگ-دەن 48 023 تگ-گە دەيىن) اسىراۋشىسىنان ايىرىلۋ بويىنشا جاردەماقى (مولشەرى 12 063 تگ-دەن 29 500 تگ-گە) الاتىن بولادى.

قازىرگى ۋاقىتتا ولار تاڭداۋى بويىنشا جاردەماقىنىڭ ءبىر ءتۇرىن عانا الىپ وتىر.  

وسى نورمانى قابىلداعان جاعدايدا اتا-اناسىنىڭ بىرەۋىنەن ايىرىلعان ون التى جاسقا دەيىنگى مۇگەدەك بالا، مۇگەدەكتىگى بويىنشا 48 023 تەڭگە مولشەرىندەگى جاردەماقىدان باسقا، ەگەر ءبىر اسىراۋىنداعى ادام بولىپ تابىلسا، اسىراۋشىسىنان ايىرىلۋ بويىنشا 29 500 تەڭگە مولشەرىندە جاردەماقى الاتىن بولادى.

سونداي-اق مۇگەدەك بالانى كۇتۋ كەزەڭىن 18 جاسقا دەيىن ۇزارتۋ ۇسىنىلىپ وتىر. ءقازىر مۇگەدەك بالانى كۇتۋ كەزەڭى 16 جاسقا دەيىن. بۇل نورما مۇگەدەك بالالاردىڭ جاس توپتارىنىڭ وزگەرۋىنە بايلانىستى ەنگىزىلەدى.