مەملەكەت باسشىسى قاسىم-جومارت توقايەۆ قىرعىزستان پرەزيدەنتى سادىر جاپاروۆپەن تەلەفون ارقىلى سويلەستى، دەپ حابارلادى اقوردا سايتى.
توقايەۆ ۇلىقتاۋ ءراسىمىنىڭ ءساتتى وتكەنىن ايتىپ، سادىر جاپاروۆتى قىرعىزستان پرەزيدەنتى بولىپ سايلانۋىمەن تاعى ءبىر مارتە قۇتتىقتاپ، باۋىرلاس قىرعىز حالقىنىڭ وركەندەۋى مەن يگىلىگى جولىنداعى جاۋاپتى قىزمەتىنە ساتتىلىك تىلەدى.
"تاراپتار دوستىققا، تاتۋ كورشىلىككە جانە ستراتەگيالىق ارىپتەستىككە قۇرىلعان قازاق-قىرعىز قاتىناستارىنىڭ بەرىكتىگىن ناقتىلاپ، ەكىجاقتى ىقپالداستىقتى جاڭا دەڭگەيگە كوتەرۋ ماقساتىندا بىرلەسىپ بەلسەندى جۇمىس ىستەۋگە دايىن ەكەندەرىن راستادى" دەلىنگەن رەسمي سايت حابارلاماسىندا.
سادىر جاپاروۆ پرەزيدەنتتىڭ ىزگى تىلەگىنە العىس ايتىپ، قىزمەتكە كىرىسۋىنە وراي ەلباسى نۇرسۇلتان نازاربايەۆتىڭ قۇتتىقتاۋ حات جىبەرگەنى ءۇشىن ريزاشىلىعىن ءبىلدىردى.
پىكىر قالدىرۋ