2021 جىلدان باستاپ جوعارى وقۋ ورىندارى جەكە ۇلگىدەگى ديپلومدار بەرەتىن بولادى. بۇل تۋرالى ءبىلىم جانە عىلىم ۆيسە-مينيسترى ميراس داۋلەنوۆ حابارلادى.
– جەكە ۇلگىدەگى ديپلومدار جۇمىس بەرۋشىلەرگە مامان دايارلاۋ ساپاسىن باعالاۋعا مۇمكىندىك بەرەدى. ديپلومداردا جوعارى وقۋ ورنى، ءبىلىم بەرۋ باعدارلاماسىنىڭ اتاۋى، ءبىتىرۋشىنىڭ دەرەكتەرى، وقىتۋ نىسانى كورسەتىلۋگە ءتيىس. بەرىلگەن ديپلومعا دەربەس جاۋاپتى بولاتىن رەكتوردىڭ قولى بولۋعا ءتيىس. بعم جاساعان بىرەگەي سايكەستەندىرۋ ءنومىرى بولادى، – دەدى ۆيسە-مينيستر.
ول ءوز سوزىندە ءار ديپلومدا قورعانىس بەلگىلەرى بولۋى كەرەكتىگىن جەتكىزدى.
– جوعارى وقۋ ورنىنىڭ وسى وقۋ ورنىندا وقىماعان، ءبىلىم بەرۋ باعدارلاماسىن اياقتاماعان ادامعا ديپلوم بەرۋى ليسەنزيادان ايىرۋ جانە اككرەديتتەۋدى كەرى قايتارىپ الۋعا نەگىز بولا الادى. جەكە ۇلگىدەگى ديپلومداردى قولدان جاساۋ رەسمي قۇجاتتاردى قولدان جاساۋ بولىپ سانالادى. مۇنداي ارەكەت ءۇشىن قىلمىستىق كودەكستىڭ 385-بابى بويىنشا جاۋاپكەرشىلىك كوزدەلگەن، – دەپ جازدى جەلىدەگى جازباسىندا.
پىكىر قالدىرۋ