قازاقستاننىڭ باس سانيتار دارىگەرى ەرلان كياسوۆ كوروناۆيرۋسقا قارسى "سپۋتنيك V" ۆاكسيناسى تۋرالى ايتتى.
– كۆي-عا قارسى ۆاكسيناسيادا رەسەيدىڭ ەپيدەميولوگيا جانە ميكروبيولوگيا عىلىمي-زەرتتەۋ ورتالىعى ازىرلەگەن "سپۋتنيك V" ۆاكسيناسى قولدانىلادى. الەمدەگى جەتەكشى مەديسينالىق عىلىمي جۋرنالداردىڭ ءبىرى – Lancet (ۇلىبريتانيا) SARS-CoV-2 كوروناۆيرۋسىنا قارسى ۆاكسينانىڭ تيىمدىلىگى 91،6%-دى قۇراعانىن حابارلادى.
"سپۋتنيك V-دان" كەيىن يممۋنيتەت كەم دەگەندە 2 جىل ساقتالۋى مۇمكىن ەكەنى دالەلدەندى. ۆاكسينا كوروناۆيرۋستىڭ "بريتانيالىق" جانە "وڭتۇستىك افريكا" جاڭا شتامدارىنا قارسى ءتيىمدى، – دەدى ول.
سونداي-اق باس سانيتار دارىگەر ۆاكسينانى جاساۋشىلار "سپۋتنيك" COVID-19-دىڭ ورتاشا جانە اۋىر اعىمىنان 100% قورعايتىنىن ءمالىم ەتتى.
– جوعارىدا اتاپ وتكەنىمىزدەي، ۆاكسيناسيا ۆاكسينانىڭ ءتۇسۋىن جانە حالىقتىڭ ءارتۇرلى توپتارىنىڭ ەپيدەميولوگيالىق ماڭىزىن ەسكەرە وتىرىپ، كەزەڭ-كەزەڭىمەن جۇزەگە اسىرىلادى، – دەدى ەرلان قياسوۆ.
پىكىر قالدىرۋ