پرەمەر-مينيستر اسقار مامين الماتى قالاسىنا جۇمىس ساپارى بارىسىندا قالانىڭ الەۋمەتتىك-ەكونوميكالىق دامۋى ماسەلەلەرى جونىندە كەڭەس وتكىزدى، دەپ حابارلادى primeminister.kz سايتى.

الماتى قالاسىنىڭ اكىمى باقىتجان ساعىنتايەۆ جانە ونىڭ ورىنباسارلارى ۇكىمەت باسشىسىنا بايانداما جاسادى. 

كەزدەسۋدە ينجەنەرلىك، كولىك جانە تۇرعىن ءۇي ينفراقۇرىلىمىن دامىتۋ، ءبىلىم بەرۋ جانە دەنساۋلىق ساقتاۋ، كاسىپكەرلىك جانە ينۆەستيسيالار تارتۋ، قورشاعان ورتانى قورعاۋ جانە الماتى قالاسىن گازداندىرۋ ماسەلەلەرى قارالدى. الماتى اگلومەراسياسىن دامىتۋ جانە 2020-2024 جىلدارعا ارنالعان "جاڭا الماتى" كەشەندى جوسپارىن ىسكە اسىرۋ ماسەلەلەرىنە ەرەكشە كوڭىل ءبولىندى. 

– الماتى قالاسى ەلدىڭ ءجىو-نىڭ بەستەن ءبىر بولىگىن قامتاماسىز ەتە وتىرىپ، الەۋمەتتىك-ەكونوميكالىق دامۋ كورسەتكىشتەرى بويىنشا وڭىرلەر اراسىندا جەتەكشى ورىنعا يە. مەگاپوليستىڭ ودان ءارى ايتارلىقتاي دامۋ الەۋەتى بار. جاڭا جۇمىس ورىندارىن قۇرۋ، قالا تۇرعىندارىنىڭ ءومىر ءسۇرۋ ساپاسى مەن ءال-اۋقاتىن ارتتىرۋ، ينفراقۇرىلىمدى جانە جالپى العاندا، الماتى اگلومەراسياسىنىڭ ەكونوميكاسىن دامىتۋ ءۇشىن بارلىق جاعدايدى جاساۋ قاجەت، – دەدى مامين.

ۇكىمەت باسشىسى بارلىق جوسپارلانعان جوبالاردى ۋاقىتىلى جانە ساپالى جۇزەگە اسىرۋدى، سونداي-اق الماتى قالاسىن ودان ءارى دامىتۋعا ينۆەستيسيالار تارتۋدى قامتاماسىز ەتۋدى تاپسىردى.

رەسمي سايتتىڭ حابارلاۋىنشا، 2020 جىلدىڭ قورىتىندىسى بويىنشا الماتى قالاسىندا ونەركاسىپ ءوندىرىسىنىڭ كولەمى 2019 جىلمەن سالىستىرعاندا 4،6%-عا 1،052 ترلن تەڭگەگە دەيىن وسكەن، ونىڭ ىشىندە وڭدەۋ ونەركاسىبى 6،9%-عا (ماشينا جاساۋ 35،8%-عا، فارماسيەۆتيكا 43،5%-عا، قاعاز ءوندىرۋ 95،6%-عا، جەڭىل ونەركاسىپ 5 ەسە) ارتقان.

"2021-2024 جىلدارى الماتى قالاسىندا 35،4 مىڭ جاڭا جۇمىس ورنىن قۇرا وتىرىپ، جالپى قۇنى 4،5 ترلن تەڭگە بولاتىن 201 ينۆەستيسيالىق جوبادان تۇراتىن پۋل قۇرىلدى. بيىل 7 مىڭنان استام جۇمىس ورنىن اشا وتىرىپ، 187،9 ملرد تەڭگەگە 92 جوبانى ىسكە اسىرۋ جوسپارلانۋدا" دەلىنگەن حابارلامادا.