مەملەكەت باسشىسى مادەنيەت جانە سپورت ءمينيسترى اقتوتى رايىمقۇلوۆانى قابىلدادى، دەپ حابارلادى اقوردا سايتى.
"رايىمقۇلوۆا پرەزيدەنتكە مادەنيەت، سپورت، تۋريزم، ارحيۆ، كينەماتوگرافيا سالالارىندا اتقارىلعان جۇمىستار تۋرالى ەسەپ بەردى. سونىمەن قاتار بيىل وتەتىن تاۋەلسىزدىكتىڭ 30 جىلدىعى، جىر الىبى جامبىل جابايەۆتىڭ 175 جىلدىعى، كۇش اتاسى قاجىمۇقان مۇڭايتپاس ۇلىنىڭ 150 جىلدىعىن جانە وزگە دە اتاۋلى مەرەيتويلىق داتالاردى اتاپ وتۋگە بايلانىستى جاسالاتىن جۇمىستاردىڭ جايى باياندادى.
مينيستر شاكەن ايمانوۆ اتىنداعى "قازاقفيلم" ستۋدياسى مەن ۇلتتىق كينونى قولداۋ مەملەكەتتىك ورتالىعىنىڭ جۇمىسى، "كينەماتوگرافيا تۋرالى" زاڭعا ەنگىزىلەتىن تولىقتىرۋلار جونىندە ايتتى. مەملەكەت باسشىسىنا توكيو وليمپياداسىنا دايىندىق جۇمىسى، بالالار مەن جاسوسپىرىمدەرگە ارنالعان شىعارماشىلىق ۇيىرمەلەر مەن سپورت سەكسيالارىنا جان باسىنا شاققانداعى قارجىلاندىرۋ جۇيەسىن ەنگىزۋ بويىنشا مالىمەت بەردى" دەلىنگەن اقپاراتتىق حابارلامادا
اقتوتى رايىمقۇلوۆا پاندەميا كەزىندە ىشكى تۋريزمگە سۇرانىستىڭ ارتا تۇسكەنىن جەتكىزگەن. سالانى ىنتالاندىرۋدىڭ ءتيىمدى تەتىكتەرىنىڭ ءبىرى – بالالاردىڭ دەمالىس ورىندارىنا ۇشاقپەن بارۋىن سۋبسيديالاۋ ەكەنىن، وسىعان قاتىستى ءتيىستى تۇزەتۋ "تۋريزم قىزمەتى تۋرالى" زاڭ جوباسىنا ەنگىزىلىپ، رەسپۋبليكالىق بيۋدجەتتىك كوميسسيا تاراپىنان قولداۋ تاپقانىن اتاپ وتكەن.
كەزدەسۋ سوڭىندا قاسىم-جومارت توقايەۆ اقتوتى رايىمقۇلوۆاعا يدەولوگيالىق، تاربيەلىك ماڭىزى زور جۇمىستاردى، "رۋحاني جاڭعىرۋ" باعدارلاماسىن، سيفرلاندىرۋ بويىنشا قولعا الىنعان باستامالاردى ساپالى جالعاستىرۋ، مينيسترلىكتىڭ ونلاين جوبالارىن جانداندىرۋ جونىندە تاپسىرما بەردى.
پىكىر قالدىرۋ