الدىمەن مەسسەندجەرلەردە "2021 جىلعى 4 اقپاندا ساعات 01:51-دە اقتوبە قالاسى ءابىلقايىر حان كوشەسىندەگى "ستاديون" ايالداماسى ماڭىندا تۇرعان مەملەكەتتىك نومەرى 756 PVA 04 ۆاز 2107 اۆتوكولىگىنىڭ ىشىنەن 29.10.2002 جىلى تۋعان ازامات حايروللا داۋلەت تولەۋباي ۇلىنىڭ دەنەسى تابىلعانى" تۋرالى اقپارات تاراعان. حابارلامادا سپورتشى اتىس كەزىندە وق ءتيىپ، قايتىس بولعانى ايتىلادى.

سپورتشىنىڭ قازاسى تۋرالى اقپاراتقا پروكۋراتۋرا مەن وبلىستىڭ ىشكى ىستەر دەپارتامەنتى پىكىر بىلدىرمەگەنىمەن، وبلىستىق دەنە شىنىقتىرۋ جانە سپورت باسقارماسى قارالى حاباردى راستاپ، مەديسينالىق تاسىمال كەرەۋەتتە جاتقان داۋلەت حايروللانىڭ ءمايىتى ەكەنىن مالىمدەدى.

بەيرەسمي دەرەكتەر، كىسى ولىمىنە ادەتتەگى جانجال سەبەپ بولعانىن كورسەتەدى. داۋلەت حايروللا و باستا جانجال بولعان قالا شەتىنە دوسىنا قولداۋ كورسەتۋگە كەلگەن. الايدا ەرەگىس سوڭى ۋشىعا كەلە اتىسقا ۇلاسىپ، قاڭعىعان وق كەزدەيسوق داۋلەتكە كەلىپ تيگەن. اتقان جىگىتتەر نە ىستەرىن بىلمەي، قاتتى قورىققانىنان داۋلەتتى كولىكتەرىنە سالىپ،  قالادا ارلى-بەرلى ءجۇرىپ، اقىرىندا دەنەسىن ورتالىق ستاديون ماڭىنا كولىكتە قالدىرىپ كەتكەن. 

داۋلەت حايروللا كيوكۋشينكاي كاراتەدەن 2018 جىلعى ازيا چەمپيونى، قوڭىر بەلبەۋ يەگەرى بولاتىن. كەلەسى اپتادا ەل كۋبوگى ءۇشىن وتەتىن جارىسقا قاتىسقالى وتىر ەدى.