پرەزيدەنت قاسىم-جومارت توقايەۆ "ارسەلورميتالل" كومپانياسىنىڭ باسقارما ءتوراعاسى لاكشمي ميتتالمەن كەزدەسۋ وتكىزدى، دەپ حابارلادى اقوردا سايتى.

لاكشمي ميتتال پرەزيدەنت توقايەۆقا "ارسەلورميتالل تەمىرتاۋ" كومپانياسىنىڭ 2020 جىلعى جۇمىسىنىڭ ناتيجەلەرى مەن 2021 جىلعا ارنالعان جوسپارلارى تۋرالى اقپارات بەردى.

كەزدەسۋ بارىسىندا وندىرىستەردى جاڭعىرتۋ، ەكولوگيالىق احۋالدى جاقسارتۋ، وندىرىلەتىن ءونىم تۇرلەرىن كەڭەيتۋ ماسەلەلەرى تالقىلاندى.

"مەملەكەت باسشىسى ءوندىرىس قۋاتىن جاڭعىرتۋعا جانە ارتتىرۋعا تارتىلاتىن ينۆەستيسيالار كولەمىن ۇلعايتۋ قاجەتتىگىن ايتتى. كەمە جاساۋ، اۆتوكولىك ونەركاسىبى جانە ەلەكتروتەحنيكالىق ءوندىرىس سالالارى بويىنشا جاڭا تاۋارلار شىعارۋ ماڭىزدى مىندەت بولۋى كەرەك" دەلىنگەن حابارلامادا.

اڭگىمەلەسۋ بارىسىندا تاراپتار اتموسفەراعا بولىنەتىن قالدىقتاردى ازايتۋ، ونىڭ ىشىندە، اگلوونەركاسىپتە، كونۆەرتورلاردا، كوكسوحيميالىق ءوندىرىس پەن جەو-2-دە ەكولوگيالىق جابدىقتاردى جاڭعىرتۋعا قاتىستى كومپانيانىڭ جوسپارلارىنا ەرەكشە كوڭىل ءبولدى.

قاسىم-جومارت توقايەۆ وندىرىستەگى جاراقات الۋ جاعدايلارىن ازايتۋ، كومپانيانىڭ شەتەلدىك جانە وتاندىق جۇمىسشىلارى اراسىنداعى ەڭبەكاقى كولەمىنىڭ الشاقتىعىنا جول بەرمەۋ بويىنشا تاپسىرما بەردى.

بەينەبايلانىس فورماتىندا وتكەن كەزدەسۋگە پرەمەر-مينيستردىڭ ورىنباسارى رومان سكليار، پرەزيدەنت اكىمشىلىگى باسشىسىنىڭ ورىنباسارى تيمۋر سۇلەيمەنوۆ، قاراعاندى وبلىسىنىڭ اكىمى جەڭىس قاسىمبەك قاتىستى.