قىزىلوردادا ەكى بالاسىن قاراۋسىز قالدىرعان ازاماتشا اتا-انالىق قۇقىعىنان ايىرىلۋى مۇمكىن، دەپ حابارلادى Polisia.kz.
سايت مالىمەتىنشە، 2021 جىلدىڭ 3 اقپانى كۇنى قىزىلوردا قالاسىنداعى ءبىلىم بەرۋ ۇيىمدارىنىڭ بىرىنە 1979 جىلى تۋعان ازاماتشا ماساڭ كۇيدە كەلىپ، ازاماتتاردىڭ مازاسىن العان. بۇل دەرەك بويىنشا اتالعان ازاماتشاعا قاتىستى اكىمشىلىك قۇقىق بۇزۋشىلىق تۋرالى كودەكستىڭ 440-بابىمەن ("الكوگولدىك ىشىمدىكتەردى iشۋ نەمەسە قوعامدىق ورىندارعا ماساڭ كۇيدە كەلۋ") اكىمشىلىك حاتتاما تولتىرىلىپ، ول ۋاقىتشا بەيىمدەۋ جانە دەتوكسيكاسيا ورتالىعىنا ورنالاستىرىلدى.
"مەكتەپ اكىمشىلىگى مەن ءتارتىپ ساقشىلارى ازاماتشانىڭ تۇرعىلىقتى مەكەن-جايىن تەكسەرۋ بارىسىندا جوعارىدا كورسەتىلگەن ازاماتشانىڭ كامەلەتكە تولماعان ەكى بالاسىنىڭ قاراۋسىز، ءارى قاداعالاۋسىز قالعانىن انىقتادى. وسىعان وراي، ايەلدىڭ كامەلەتكە تولماعان التى جاستاعى قىزى وبلىستىق كامەلەتكە تولماعانداردى بەيىمدەۋ ورتالىعىنا، ءبىر جارىم جاستاعى قىزى كوپبەيىندى بالالار اۋرۋحاناسىنا ورنالاستىرىلدى. تەكسەرۋ بارىسىندا 42 جاستاعى ازاماتشاعا قاتىستى اكىمشىلىك قۇقىق بۇزۋشىلىق جاساعانى ءۇشىن ءۇش رەت حاتتاما تولتىرىلعاندىعى انىقتالدى" دەلىنگەن حابارلامادا.
قازىرگى تاڭدا قىزىلوردا قالالىق پوليسيا باسقارماسىنىڭ قىزمەتكەرلەرى اتالعان ازاماتشانى اتا-انالىق قۇقىعىنان ايىرۋ نەمەسە شەكتەۋ ماسەلەسىن شەشۋ ءۇشىن قالا اكىمى جانىنداعى كامەلەتكە تولماعاندار ىستەرى جانە ولاردىڭ قۇقىقتارىن قورعاۋ جونىندەگى كوميسسيا وتىرىسىنا قۇجاتتار جيناقتاپ جاتىر.
پىكىر قالدىرۋ