فيلولوگيا عىلىم­دارىنىڭ كانديداتى توق­تار الىبەكوۆ ومىردەن وزدى، دەپ حابارلادى ەگەمەن قازاقستان سايتى.

مۇحتار اۋەزوۆ اتىنداعى ادەبيەت جانە ونەر ينستيتۋتىنىڭ تەكستولوگ-عالىمى توقتار الىبەكوۆ سيرەك قورلاردا ساقتالعان عىلىمي، ادەبي شىعارمالاردى قۇراستىرىپ، جارىققا شىعارعان.

بۇگىنگە دەيىن عالىمنىڭ جەكە، وزگە دە زەرتتەۋشىلەرمەن قۇراستىرعان، جاۋاپتى رەداكتور رەتىندە جەتەكشىلىك ەتكەن 150-گە جۋىق عىلىمي جيناعى ەلدىڭ بارلىق كىتاپحانالارىنداعى وقىرمانداردىڭ، جوعارى وقۋ ورىندارى ستۋدەنتتەرىنىڭ عىلىمي ورتانىڭ يگىلىگىنە اينالدى. ەلباسى نۇرسۇلتان نازاربايەۆتىڭ باستاماسىمەن "مادەني مۇرا" مەملەكەتتىك باعدارلاماسى اياسىندا قولعا الىنعان "بابالار ءسوزى" 100 تومدىق سەرياسىن باسپاعا دايىنداپ جانە قۇراستىرۋعا قاتىسقان عالىمدار توبى جەتەكشىلەرىنىڭ ءبىرى (2010-2013) بولدى. وسى عالىمداردىڭ  تىنىمسىز ەڭبەگى مەن ۋاقىتپەن ساناسپاي جۇمىس ىستەۋىنىڭ ارقاسىندا سەريالى كىتاپ، مەرزىمىنەن ءبىر جىل بۇرىن جارىققا شىقتى.

عالىمنىڭ  قالام تارتقان تاقىرىپتارى از ەمەس. ول  "ابايتانۋ" سالاسىنا دا ءمان بەرىپ، اقىننىڭ "قارا سوزدەر" (2007)، 1909 جىلى سانكت-پەتەربۋرگ قالاسىندا تۇڭعىش رەت جارىق كورگەن "قازاق اقىنى يبراھيم قۇنانباي ۇعىلىنىڭ ولەڭى" جيناقتارىنىڭ وڭدەلىپ، قايتا باسىلۋىنا، ول تۋرالى "اباي جانە ۇلتتىق يدەيا"، "اباي قۇنانبايەۆ. بيبليوگرافيالىق كورسەتكىشى (1988-2006)"،  "اباي ءداستۇرى جانە قازىرگى قازاق ادەبيەتى"، "اباي مۇراسى – قازاقتىڭ ۇلتتىق قازىناسى" سىندى زەرتتەۋ ەڭبەكتەرىن باسپاعا دايىندادى.  سونداي-اق  ابايدىڭ ادەبي مۇرالارىنا قاتىستى تەكستولوگيالىق زەرتتەۋلەر جازدى.