قازاقستان ازاماتتارى جەكە ءتۇرعىنۇي قۇرىلىسىنا ارنالعان 10 سوتىق جەر ۋچاسكەسىن تەگىن الۋعا قۇقىلى. جەر ۋچاسكەسى وزگە جىلجىمايتىن مۇلىكتىڭ بارىنا قاراماستان بەرىلەدى. تومەندەگى ماتەريالدا ۋچەسكە الۋدىڭ ءتارتىبى تۇسىندىرىلگەن.

ۋچاسكەنى الۋعا ءوتىنىش تاپسىرۋ

الدىمەن سۇرالاتىن ۋچاسكە ورنالاسقان جەردىڭ اكىمشىلىگىنە ەركىن فورمادا جەكە ءتۇرعىنۇي قۇرىلىسىنا ارنالعان ۋچاسكەگە ءوتىنىم جازىلادى. ەگەر سۇرالاتىن ۋچاسكە رەسپۋبليكالىق ماڭىزى بار قالا اۋماعىندا ورنالاسسا، وندا ءوتىنىم سول قالانىڭ اكىمشىلىگىنە باعىتتالادى. ەگەر ۋچاسكە اۋىلدىق ەلدىمەكەندە بولسا، وندا اۋىل اكىمدىگىنە جۇگىنۋ قاجەت.

ءوتىنىم بەرۋشى ادامدا جەكە باسىن كۋالاندىراتىن قۇجاتتىڭ ءتۇپنۇسقاسى مەن كوشىرمەسى بولۋعا ءتيىس.

وتىنىمدە جەر ۋچاسكەسىن قولدانۋداعى ماقسات، ونىڭ شەكتى كولەمى، ورنالاسقان ورنى، سۇراتىلعان پايدالانۋ قۇقىعى مەن سۇراۋشى ادام پايدالانعىسى كەلەتىن بۇدان وزگە جەر ۋچاسكەسى تۋرالى اقپارات ۇسىنىلۋى مىندەتتى.

ءوتىنىمنىڭ قارالۋ مەرزىمى

ءوتىنىمنىڭ جالپى قارالۋ مەرزىمى – 2 اي.

اكىمشىلىك سۇرالعان جەر ۋچاسكەسىن پايدالانۋ مۇمكىندىگىن انىقتاۋ ءۇشىن قۇجاتتاردى جەر ماسەلەسى مەن ارحيتەكتۋراعا جاۋاپتى ورگانعا جولدايدى. قۇجات 10 جۇمىس كۇنى مەرزىمى ارالىعىندا قارالادى. ارتىنشا 2 جۇمىس كۇنى ىشىندە جەر كوميسسياسىنىڭ قاراۋىنا بەرىلەدى.

ارنايى ەسەپكە قويۋ (كەزەككە تۇرعىزۋ)

بولۋگە ارنالعان دايىن الاڭ بولماعان جاعدايدا، ءوتىنىم ارنايى ەسەپكە الىنادى ياعني كەزەككە تۇرعىزىلادى. مۇنان كەيىن 2 جۇمىس كۇنى ىشىندە جالپى تىزىمدەگى كەزەك نومەرى كورسەتىلگەن حابارلاما بەرىلەدى. ال دايىن الاڭ بولعان جاعدايدا ءوتىنىم بەرۋشىگە ءبىر اي ىشىندە ءوتىنىم بەرۋ كەرەكتىگى تۋرالى حابارلاما جىبەرىلەدى. دايىن الاڭدار مەن كەزەك ءتىزىمى تۋرالى اقپارات اشىق ءارى اكىمشىلىك سايتىندا نەمەسە اقپارات قۇرالدارىندا جاريالانادى. 

جەر ۋچاسكەسىن تاعايىنداۋ

كەزەك كەلگەن كەزدە حالىققا قىزمەت كورسەتۋ ورتالىقتارىنا جۇگىنىپ، بولىنگەن جەر ۋچاسكەسىن ۋاقىتشا پايدالانۋ قۇقىعىن راسىمدەۋ ءۇشىن قاجەتتى قۇجاتتاردى ۇسىنۋ قاجەت. راسىمدەۋ كەزىندە اكتتەردى دايىنداۋ مەن وزگە شىعىندارعا كەتەتىن قاراجاتتى ءوتىنىم بەرۋشى وتەيدى. ولار تۋرالى تولىعىراق مىنا جەردەن بىلۋگە بولادى.

جەردى پايدالانۋ تۋرالى اكت بەرىلگەن كۇننەن كەيىن جارتى جىل ىشىندە مىندەتتى تۇردە جەكە ءتۇرعىنۇيدى پايدالانۋعا بەرۋ قاجەت. سول كەزدە عانا جەر ۋچاسكەسى جەكەمەنشىككە وتەدى. ەگەر جارتى جىل ىشىندە ءۇي سالىنىپ بىتپەسە، حقكو ارقىلى ۋاقىتشا ارەندا مەرزىمىن ءبىر جىلعا دەيىن سوزۋعا بولادى. ەگەر ەكى جىل ىشىندە جەر ۋچاسكەسى ماقساتتى پايدالانىلماسا، ياعني قۇرىلىس جۇمىسى جۇرمەسە نەمەسە ءۇي پايدالانۋعا بەرىلمەسە، مەملەكەت ونى قايتارىپ الۋعا قۇقىلى. سونداي-اق مۇنداي جاعدايدا جەر كودەكسىنىڭ 93-بايۋبىنا ساي مەملەكەتكە كەلگەن زالالدىڭ ورنىن تولتىرۋ قاجەت بولادى.

وسىلايشا، ءۇي سالىنىپ بىتكەندە عانا مەملەكەتتەن بەرىلگەن جەر ۋچاسكەسى تولىقتاي جەكەمەنشىككە وتەدى. وعان دەيىن جەر ۋاقىتشا يەلىكتە بولادى.

دەرەككوز: zakon.kz.