ءماجىلىس دەپۋتاتى داريعا نازاربايەۆا پەداگوگتەر جالاقىسىنىڭ تومەندىگى تۋرالى ۇكىمەت باسشىسى اسقار مامينگە ساۋال جولدادى.

– ءبىزدى ءبىلىم سالاسىنداعى شەشىمىن تاپپاعان وزەكتى ماسەلە – مەملەكەتتىك تاپسىرىس شەڭبەرىندە قارجىلاندىرىلاتىن جەكەمەنشىك بالاباقشالارداعى پەداگوگتەر جالاقىسىنىڭ تومەندىگى مازالاپ وتىر. الداعى ەكى جىل ىشىندەگى مەملەكەتتىك تاپسىرىستا مەكتەپكە دەيىنگى جەكەمەنشىك مەكەمەلەردە پەداگوگتەردىڭ جالاقىسىن كوتەرۋ قاراستىرىلماعان. ءبىلىم جانە عىلىم ءمينيسترى مىندەتىن اتقارۋشىنىڭ 2020 جىلدىڭ 20 قازان كۇنگى بۇيرىعىمەن قارجىلاندىرۋ ادىستەمەسىنە وزگەرىستەر ەنگىزىلگەن، – دەدى ول.

ونىڭ ايتۋىنشا، رەسمي جالاقىعا تۇزەتۋ كوەففيسيەنتىن 2020 جىلى – 25%، 2021 جىلى – 50%، 2022 جىلى – 75%، 2023 جىلى – 100% مولشەرىندە ەنگىزۋ، پەداگوگتەردىڭ ەڭبەك دەمالىسىنىڭ ۇزاقتىعىن 56 كۇنتىزبەلىك كۇنگە دەيىن ارتتىرۋ تۋرالى ايتىلعان. اتالعان بۇيرىق جەرگىلىكتى جەرلەردە ورىندالماي وتىر.

– ناتيجەسىندە، جەكەمەنشىك بالاباقشالاردىڭ پەداگوگتەرى ءوز ەڭبەگىنىڭ ادال اقىسىن الا الماي وتىر. ءبىلىم تۋرالى زاڭعا سايكەس، جەرگىلىكتى اتقارۋشى ورگاندار مەكتەپكە دەيىنگى تاربيە بەرۋ جانە وقىتۋ ىسىنە مەملەكەتتىك تاپسىرىستى بەكىتەدى. ەگەر دە جەرگىلىكتى بيۋدجەتتە قاراجات تاپشى بولسا، جان باسىنا قارجىلاندىرۋ تەتىگىن ىسكە اسىرۋ ءۇشىن رەسپۋبليكالىق بيۋدجەتتەن ماقساتتى اعىمداعى ترانسفەرتتەر ەسەبىنەن شىعىنداردى وتەۋ قاراستىرىلعان.

قازىرگى ۋاقىتتا اكىمدىكتەر ءبىر بالاباقشا تاربيەلەنۋشىسىنە جان باسىنا شاققانداعى ءنورماتيۆتىڭ مولشەرىن ەرىكتى تۇردە انىقتايدى. ال بۇل بەلگىلەنگەن ءنورماتيۆتىڭ ورتاشا مولشەرىنەن ەداۋىر تومەن. ناتيجەسىندە، جەكەمەنشىك بالاباقشالار مەن پەداگوگتەر ءتيىستى قارجىنى الا الماي وتىر. كوپتەگەن مامان جۇمىسىنان ايىرىلىپ، مەكەمەلەر جابىلۋدا، – دەدى نازاربايەۆا.

وسىلايشا داريعا نازاربايەۆا پرەمەر-مينيستر اسقار ماميننەن وبلىستاردا مەملەكەتتىك تاپىرىستىڭ كولەمى قالاي قالىپتاساتىنىن، جەكە قارجىلاندىرۋ اياسىندا بولىنگەن قارجىنى جەرگىلىكتى اكىمدىكتەر ءىس جۇزىندە قايدا بولەتىنىن، جەرگىلىكتى اتقارۋشى ورگانداردىڭ جەكە قارجىلاندىرۋ كولەمىن تومەندەتۋگە قۇقىعى بار-جوعىن سۇرادى.