قازاقستان جازۋشىلار وداعىنىڭ مۇشەسى، "پاراسات"، "قۇرمەت" وردەندەرىنىڭ، "ەڭبەكتەگى ەرلىگى ءۇشىن" مەدالىنىڭ يەگەرى ىرىم كەنەنباي 74 جاسقا قاراعان شاعىندا دۇنيەدەن وزدى.

 

ىرىم سۋانباي ۇلى كەنەنباي 1947 جىلى 19 ماۋسىمدا الماتى وبلىسى تالدىقورعان اۋدانىنىڭ جەتىسۋ الاتاۋى دۇنيەگە كەلدى. 1969 جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. وتكەن عاسىردىڭ جەتپىسىنىشى جىلدارىنان باستاپ جان-جاقتى، سان قىرلى جۋرناليستىك تالانتىمەن تانىلىپ، ءار جىلدارى رەسپۋبليكالىق باسىلىمداردا، باسپا سالاسىندا قىزمەتتەر اتقاردى. ول "لەنينشىل جاس" گازەتىندە 11 جىل بويى قىزمەت جاساپ، گازەتتىڭ مادەنيەت جانە عىلىم، جاستار، ناسيحات بولىمدەرىنە جەتەكشىلىك ەتتى، رەدكوللەگيا مۇشەسى جانە 1979-1985 جىلدارى "قازاقستان" باسپاسىندا اعا رەداكتور، "مەكتەپ" باسپاسىندا ءبولىم مەڭگەرۋشىسى، باس رەداكتوردىڭ ورىنباسارى بولدى. ارنايى ۇكىمەت كاۋلىسىمەن جاڭادان اشىلعان "انا ءتىلى" باسپاسىنىڭ ۇيىمداستىرۋشىلارىنىڭ ءبىرى، باس رەداكتوردىڭ ورىنباسارى، ديرەكتوردىڭ ءبىرىنشى ورىنباسارى، ديرەكتورى سىندى جاۋاپتى قىزمەتتەردە كورىندى. سونىمەن قاتار، "ءبىلىم" باسپاسىن ۇيىمداستىرىپ، باسشىلىق ەتتى. ى.كەنەنباي ۇزاق جىلدار "الاتاۋ" باسپا-پوليگرافيالىق كورپوراسياسىنىڭ پرەزيدەنتى بولعان.

 

ونىڭ "لاباسى ەتەگىندە"، "قىردا وسكەن قىزعالداقتار"، "جاس شوپاندار اۋىلى"، "ءىنجۋ-مارجاندار"، "ءبىر ۋىس ءدان"، "قولعانات"، "ەر جۇرەگى"، "ماڭگى جاز ەلى"، تاڭدامالى شىعارمالار جيناعى (1،2 توم) سىندى كوپتەگەن كىتاپتارى جارىق كورگەن.

 

"ەلىمىزدەگى باسپا سالاسىنىڭ قارقىندى دامۋىنا، جاڭا بەلەسكە كوتەرىلۋىنە ايرىقشا ۇلەس قوسقان، قازاق ءباسپاسوزى مەن ادەبيەتىندە وزىندىك قولتاڭباسىن قالىپتاستىرعان، وزىنە جۇكتەلگەن جاۋاپتى قىزمەتتەردى ابىروي بيىگىندە اتقارىپ، اينالاسىنا، ەل-جۇرتىنا سىيلى بولعان قالامگەردىڭ جارقىن بەينەسى وقىرمان جادىندا، ارىپتەستەرىنىڭ جۇرەگىندە ماڭگى ساقتالادى" دەلىنگەن حابارلامادا.