ءقازىردىڭ وزىندە ءبىرقاتار ەلدەن وتاندىق ۆاكسيناعا قىزىعۋشىلىق بار. بۇل تۋرالى دەنساۋلىق ساقتاۋ ءمينيسترى الەكسەي سوي ورتالىق كوممۋنيكاسيالار قىزمەتىندە وتكەن ونلاين بريفينگتە مالىمدەدى.

– ءبىرقاتار مەملەكەت تاراپىنان قازاقستاندىق ۆاكسيناعا قىزىعۋشىلىق بار. ولار بايلانىسقا شىقتى. بارلىعى كلينيكالىق زەرتتەۋلەر ناتيجەسىن كۇتىپ وتىر.

وسى ۋاقىتقا دەيىن "QazCovid-In" ۆاكسيناسى ءۇش مىڭ ەرىكتىگە cالىندى. ولاردىڭ جاعدايى جاقسى، جاعىمسىز اسەر بايقالعان جوق. شامامەن، ءساۋىر ايىندا ۆاكسينا شىعارىلادى. ءبىز وعان ۇلكەن سەنىم ارتىپ وتىرمىز. الدىن الا بولجام بويىنشا وتاندىق ۆاكسينانىڭ تيىمدىلىگى 90 پروسەنتتەن اسىپ وتىر. بۇل – وتە جاقسى كورسەتكىش، –  دەدى مينيستر.

سوي وتاندىق ۆاكسينا شىققان بويدا ىشكى نارىققا جىبەرىلەتىنىن جانە ءبىرىنشى بولىپ سالدىراتىنىن اتاپ ءوتتى.