فرانسۋز پرەزيدەنتىنىڭ قولداۋىمەن فرانسيانىڭ يادرولىق سۇڭگۋىر كەمەسى وڭتۇستىك جۇڭگو تەڭىزىندە كىردى. بۇل بەيجىڭنىڭ اشۋ-ىزاسىن تۋدىرۋى جانە قىتاي-فرانسۋز قاتىناستارىن شيەلەنىستىرۋى مۇمكىن.
يادرولىق سۇڭگۋىر كەمەنىڭ جىبەرىلگەنىن فرانسيانىڭ قورعانىس ءمينيسترى فلورەنس پارلي راستادى. ول ءوزىنىڭ تۆيتتەرىندە "بۇل كەزەكتەن تىس پاترۋل وڭتۇستىك جۇڭگو تەڭىزىنەن ءوتۋدى جاڭا اياقتادى" دەپ جازدى.
"ءبىزدىڭ فرانسۋز اسكەري-تەڭىز كۇشتەرىمىزدىڭ ۇزاق ۋاقىت بويى اۆستراليالىق، امەريكالىق جانە جاپوندىق ستراتەگيالىق سەرىكتەستەرىمەن بىرلەسكەن اسكەري دايىندىق قابىلەتىنىڭ ايقىن دالەلى" دەدى ول.
پوستقا تەڭىزدەگى ەكى كەمەنىڭ سۋرەتى ءىلىندى.
وڭتۇستىك جۇڭگو تەڭىزى - بۇل جاھاندىق ساۋدانىڭ نەگىزگى جەتكىزىلىم جولى جانە الەۋەتتى ەنەرگيا رەسۋرستارىنا باي.
ساراپشىلاردىڭ پىكىرىنشە، تەڭىز تۇبىندە 11 تريلليون باررەلگە دەيىن مۇناي جانە 190 تريلليون تەكشە فۋت تابيعي گاز بولۋى مۇمكىن.
جۇڭگو ايماقتاعى كەن ورىندارىنا قاتىستى ءوز تالاپتارىن راستاۋعا تىرىسادى.
بەيجىڭ فيليپپين، مالايزيا جانە تايۆان جاعالاۋلارىنا دەيىنگى بۇكىل سۋ جولى قىتايعا تيەسىلى ەكەنىن ايتادى. دەگەنمەن، 2016 جىلى حالىقارالىق اربيتراج سوتى بۇل تالاپتى قابىلدامادى.
ايتا كەتەيىك، بۇعان دەيىن وڭتۇستىك جۇڭگو تەڭىزىندە اقش-قىتاي اسكەري كۇشتەرىنىڭ بەتپە-بەت كەلۋلەرى جيىلەپ، شيەلەنىستىڭ كۇشەيىپ بارا جاتقانى حابارلانعان.
پىكىر قالدىرۋ