بۇگىننەن باستاپ قازاقستاندىقتار جۇرگىزۋشى كۋالىگى مەن تەحنيكالىق ءتولقۇجاتسىز كولىك جۇرگىزە بەرۋىنە بولادى.
13 اقپاندا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭى كۇشىنە ەندى.
جۇرگىزۋشىلەرگە وزدەرىمەن بىرگە جۇرگىزۋشى مەن كولىك قۇرالىن تىركەۋ كۋالىكتەرىن الىپ جۇرمەۋگە بولادى. وسى قۇجاتتاردىڭ جوقتىعى ءۇشىن ازاماتتار اكىمشىلىك جاۋاپكەرشىلىككە تارتىلمايدى. جۇرگىزۋشىلەر وزىمەن بىرگە جەكە باسىن كۋالاندىراتىن قۇجاتتىڭ ءتۇپنۇسقاسىن الىپ ءجۇرۋى ءتيىس.
قۇقىق قورعاۋ ورگاندارىنىڭ قىزمەتكەرلەرى كولىك يەسى كىم ەكەنىن اقپارات جۇيەلەرى ارقىلى تەكسەرەدى. قىزمەتتىك پلانشەتتەردە "اكىمشىلىك وندىرىستەردىڭ ءبىرىڭعاي ءتىزىلىمى" باعدارلاماسى ورناتىلعان. وندا جۇرگىزۋشى مەن كولىك تۋرالى بارلىق دەرەكتەر: اۆتوكولىك قۇرالى كىمگە تيەسىلى ەكەنى، قانداي قۇقىق بۇزۋشىلىقتار تىركەلگەنى، تەحنيكالىق بايقاۋدان وتكەن-وتپەگەنى جانە ساقتاندىرۋ ءپوليسى رەسىمدەلگەنى تۋرالى دەرەكتەر بولادى. بۇگىندە پاترۋلدىك پوليسيانىڭ ساپتىق بولىمشەلەرىندە وسىنداي 8 649 پلانشەت بار.
جەكە باستى كۋالاندىراتىن قۇجاتتارعا قازاقستان رەسپۋبليكاسى ازاماتىنىڭ پاسپورتى، جەكە كۋالىك، ازاماتتىعى جوق ادامنىڭ كۋالىگى جاتادى. ستۋدەنتتىك بيلەت، قىزمەتتىك كۋالىك بۇل تىزىمگە كىرمەيدى.
بۇل وزگەرىس شەتەلدىك نومىرلەرى بار كولىكتەرگە، سونداي-اق قازاقستاننان تىس جەرلەردە جۇرگىزۋ قۇقىعىنا كۋالىك العان جۇرگىزۋشىلەرگە قاتىسى جوق. ولار جۇرگىزۋ كەزىندە جۇرگىزۋشى كۋالىگىن جانە كولىك قۇرالىن تىركەۋ كۋالىگىن كورسەتۋگە مىندەتتى.
پىكىر قالدىرۋ