پرەمەر-مينيستر اسقار مامين شىمكەنت پەن تۇركىستاندى دامىتۋ جوبالارىن تەكسەردى، دەپ حابارلادى primeminister.kz سايتى.

سايتتىڭ مالىمەتىنشە، مامين جۇمىس ساپارى اياسىندا شىمكەنت پەن تۇركىستان قالالارىنىڭ كولىك، تۇرعىن ءۇي جانە الەۋمەتتىك-مادەني ينفراقۇرىلىمى وبەكتىلەرىنىڭ قۇرىلىس بارىسىن، سونداي-اق ءوڭىردىڭ ونەركاسىپتىك جانە سۋ-ەنەرگەتيكالىق الەۋەتىنىڭ دامۋىن تەكسەرگەن.

شىمكەنتتە ۇكىمەت باسشىسىنا وتكىزۋ قابىلەتى ساعاتىنا 2000 جولاۋشىنى قۇرايتىن حالىقارالىق اۋەجايدىڭ جاڭا جولاۋشىلار تەرمينالىنىڭ قۇرىلىسى تۋرالى باياندالدى. ونى بيىل قازان ايىندا ىسكە قوسۋ كوزدەلگەن. 

ا. مامين بيىل پايدالانۋعا بەرۋ جوسپارلانعان د. قونايەۆ داڭعىلى مەن ت. رىسقۇلوۆ كوشەسىنىڭ قيىلىسىنداعى كولىك جولايىرىعىنىڭ قۇرىلىسىن تەكسەردى.

سونىمەن قاتار ول سورعى قوندىرعىلارىن، قۇبىر ارماتۋراسى مەن ەلەكتر جابدىعىن شىعاراتىن Karlskrona LC AB جشس-عا باردى. كاسىپورىننىڭ قۋاتتىلىعى 2،5 مىڭنان 10 مىڭعا دەيىن سۋ سورعىسىن، سونداي-اق 7 مىڭ توننا قۇيما مەن ستاندارتتى ەمەس جابدىقتاردى قۇرايدى.

پرەمەر-مينيستر "شىمكەنت سيتي" شاعىن اۋدانىنىڭ قۇرىلىس بارىسىمەن تانىستى. وندا ينۆەستورلار "شىمكەنت" الەۋمەتتىك-كاسىپكەرلىك كورپوراسياسىمەن بىرلەسىپ، تۇرعىن ءۇي قۇرىلىسى (532 مىڭ شارشى مەتر تۇرعىن ءۇي) جانە ءبىلىم بەرۋ (3800 ورىندىق 2 مەكتەپ) سالالارىنداعى 9 جوبانى ىسكە اسىرۋعا 199 ملرد تەڭگە باعىتتايدى.

بيىلعى قاڭتار ايىندا شىمكەنت قالاسىندا ونەركاسىپ ءونىمىن ءوندىرۋ كولەمى 2020 جىلدىڭ ءتيىستى كەزەڭىنە قاراعاندا 9،6 پايىزعا ۇلعايىپ، 54،4 ملرد تەڭگەنى قۇرادى. وڭدەۋ ونەركاسىبىندە تۇراقتى ديناميكا بايقالىپ وتىر، ول جىل باسىنان بەرى 10،6 پايىزعا ءوستى. فارماسيەۆتيكا (+54،6 پايىز)، كوكس جانە مۇناي ونىمدەرىن ءوندىرۋ (+12،6 پايىز)، وزگە دە مەتالل ەمەس ونىمدەر (+12،2 پايىز)، ازىق-تۇلىك ونىمدەرىن شىعارۋ (+7،2%ە پايىز) ءوسىمنىڭ نەگىزگى قوزعالتقىشتارىنا اينالدى.

قۇرىلىس كولەمى 27،5 پايىزعا – 1،5 ملرد تەڭگەگە دەيىن ۇلعايدى، 32،6 مىڭ شارشى مەتر تۇرعىن ءۇي پايدالانۋعا بەرىلدى، بۇل 2020 جىلعى سايكەس كورسەتكىشتەن 2،8 ەسە ارتىق. اۋىلشارۋاشىلىعىنداعى ءوندىرىس كولەمىنىڭ ءوسۋى 2،1 ملرد تەڭگەگە جەتىپ، 8،8 پايىزدى قۇرادى. نەگىزگى كاپيتالعا سالىنعان ينۆەستيسيالار 12،8 ملرد تەڭگەگە دەيىن ءوستى، بۇل 2020 جىلعى قاڭتارداعى كورسەتكىشتەن 2،7 ەسە كوپ.

2021-2025 جىلدارى شىمكەنت قالاسىندا 11 500 جاڭا جۇمىس ورنىن قۇرا وتىرىپ، 1،36 ترلن تەڭگە سوماسىنا 123 ينۆەستيسيالىق جوبادان تۇراتىن پۋل قۇرىلدى. بيىل 2300 جۇمىس ورنىن اشۋمەن 129،2 ملرد تەڭگەگە 61 جوبانى ىسكە اسىرۋ جوسپارلانىپ وتىر.

پرەمەر-مينيستر تۇركىستان وبلىسىنداعى سۋارمالى سۋ تاپشىلىعىن جويۋ جانە سۋارمالى جەرلەردىڭ تيىمدىلىگىن ارتتىرۋ جونىندەگى جۇمىستاردىڭ بارىسىن – تۇركىستان ماگيسترالدىق ارناسىن كۇردەلى جوندەۋ جانە ونى سىرداريا وزەنىنەن تولتىرۋ ءۇشىن ماشينا ارناسىن سالۋ،  "كەڭساي – قوسقورعان-2" سۋ قويماسىن سالۋ، جەتىكول كول جۇيەسىن قايتا جوندەۋ جونىندەگى جوبالار جۇمىسىنىڭ بارىسىن تەكسەردى. وسى جوبالاردى ىسكە اسىرۋ سۋ پايدالانۋدىڭ جىل سايىنعى كولەمىن 195،4 ملن تەكشە مەترگە ارتتىرۋعا جانە اوك وندىرەتىن ءونىم كولەمىن 14 ملرد تەڭگەگە ۇلعايتۋعا مۇمكىندىك بەرەدى.

تۇركىستان قالاسىندا ۇكىمەت باسشىسى اۋەجاي اۋماعىنىڭ اباتتاندىرىلۋىمەن، تۇرعىن ءۇي ينفراقۇرىلىمىنىڭ قۇرىلىسىمەن جانە قالانىڭ ىسكەرلىك ورتالىعىنىڭ دامۋىمەن، سونداي-اق ينۆەستيسيالىق جوبالاردىڭ — "كەرۋەن-ساراي" كوپفۋنكسيونالدى تۋريستىك كەشەنىنىڭ، وبلىستىق عىلىمي-امبەباپ كىتاپحانانىڭ، تۇڭعىش پرەزيدەنت ساياباعىنىڭ، "ۇلى دالا ەلى" ورتالىعىنىڭ جانە ب. ساتتارحانوۆ داڭعىلىنداعى جەلىلىك ساياباقتىڭ ىسكە اسىرىلۋىمەن تانىستى.