بيىل 17 ملن شارشى مەتر ءۇي پايدالانۋعا بەرىلەدى. بۇل تۋرالى پرەمەر-مينيستر اسقار مامين ۇكىمەت وتىرىسىندا مالىمدەدى. 

– تۇرعىن ءۇي ساياساتىن ءتيىمدى ىسكە اسىرۋ ەلباسى نۇرسۇلتان ءابىش ۇلى نازاربايەۆتىڭ 2030 جىلى ۇيمەن قامتاماسىز ەتۋدى 1 ادامعا 30 شارشى مەترگە دەيىن جەتكىزۋ تۋرالى تاپسىرماسىن ورىنداۋعا مۇمكىندىك بەرەدى. مەملەكەت باسشىسى قاسىم-جومارت كەمەل ۇلى توقايەۆ Nur Otan پارتياسىنىڭ سايلاۋالدى باعدارلاماسىن تانىستىرعان كەزدە الداعى بەس جىلدا 100 ملن شارشى مەتردەن استام ءۇي سالۋدى تاپسىردى. وسىلايشا ءبىز 1 ميلليونعا جۋىق وتباسىن ۇيمەن قامتاماسىز ەتە الامىز.

وسىنداي اۋقىمدى مىندەتتەردى جۇزەگە اسىرۋ ءۇشىن تۇرعىن ءۇي ساياساتىنا رەفورما جۇرگىزىلىپ جاتىر. وندا تۇرعىن ءۇيدىڭ قولجەتىمدىلىگىن ارتتىرۋ، جەكە قۇرىلىس سالۋشىلاردىڭ ينۆەستيسيالارىن جالدامالى تۇرعىن ءۇي سالۋعا تارتۋ ءۇشىن جاڭا شارالار كەشەنى كوزدەلگەن، – دەدى ول.

اسقار مامين بيىل 17 ملن شارشى مەتر ءۇيدى پايدالانۋعا بەرۋگە جوسپارلانعانىن اتاپ ايتتى.

– بۇل جۇمىستا "وتباسى بانك" نەگىزگى قۇرال بولماق. ول باسپاناعا مۇقتاج ادامداردىڭ كەزەگىن ءبىر ورتالىقتان قالىپتاستىرىپ، "نۇرلى جەر" مەملەكەتتىك باعدارلاماسى اياسىندا ولارعا جەڭىلدىكتى تۇرعىن ۇيلەردى ساتادى. بارلىعى وسى جىلى 17 ملن شارشى مەتر ءۇيدى پايدالانۋعا بەرۋ جوسپارلانعان. بۇل وتكەن جىلعا قاراعاندا 2 ملن شارشى مەترگە كوپ، – دەدى پرەمەر-مينيستر.