توتەنشە جاعدايلار ءمينيسترى يۋريي يلين جامبىل وبلىسى جاڭاتاس قالاسىنداعى بەس بالانىڭ قايتىس بولۋىنا سىرىڭكە سەبەپ بولۋى مۇمكىن ەكەنىن مالىمدەدى. بۇل تۋرالى «حابار»اگەنتتىگى حابارلادى.

– اناسى 5 بالانى ۇيدە قالدىرىپ، دالاعا شىعۋىنا نە سەبەپ بولعانىن بىلمەيمىن. مۇمكىن ماڭىزدى سەبەبى دە بولعان شىعار. ءقازىر تەرگەۋ جۇمىستارى ءجۇرىپ جاتىر.

ءۇي كوپقاباتتى جانە ورتالىق جىلىتۋ جۇيەسىنە قوسىلعان. پەش جوق. جىلۋ ورتالىقتان كەلەدى. ەلەكتر سىمدارىنان اقاۋلىقتار بايقالعان جوق. بالالار ابايسىزدا سىرىڭكە قولدانعان بولۋى مۇمكىن، – دەدى مينيستر.

قايتىس بولعان 5 قىزدىڭ تۋىسى سايدمۇحاممەد ابدىمالىكوۆ وقيعانىڭ قالاي بولعانىن ءتۇسىندىردى.

– كەيبىر ادامدار پاتەردە جىلۋ بولماعان، جىلىتقىشتار قولدانىلعان دەپ جازىپ جاتىر. مۇنىڭ ءبارى وتىرىك! مۇنداي بولعان جوق، بولۋى مۇمكىن ەمەس ەدى. كەلىن ۇيدە بالالارمەن وتىرعان، ول دۇكەنگە شىعىپ كەتتى. بالالار سول كەزدە سىرىڭكەمەن ويناپ، ويىنشىقتار جانعان، – دەپ ايتتى ول.

ەسكە سالا كەتەيىك،  جامبىل وبلىسى جاڭاتاس قالاسى 2 ىقشاماۋدانداعى 5 قاباتتى تۇرعىن ءۇيدىڭ 3ء-شى قاباتىندا ءورت بولعان. پاتەر ىشىندە اتا-انانىڭ قاراۋىنسىز كامەلەت جاسىنا تولماعان 2015، 2016، 2017، 2019 جانە 2020 جىلدارى تۋعان 5 بالا قالعان.

ءورت بولعان ۋاقىتتا ءۇيدىڭ وتاعاسى جۇمىستا بولعانى، ال اناسى دۇكەنگە شىعىپ كەتكەنى حابارلاندى. تۇتىنگە ۋلانعان بالالار جەدەل تۇردە اۋرۋحاناعا جەتكىزىلگەنىمەن، اراعا ءبىراز ۋاقىت سالىپ كوز جۇمعان.