بۇگىن ۇلتتىق قوعامدىق سەنىم كەڭەسىنىڭ 5-وتىرىسى ءوتتى. كەڭەس بارىسى الدىمەن اقوردانىڭ twitter پاراقشاسىندا قىسقاشا بەرىلىپ وتىردى. ەندى مىنە، اقوردا سايتى پرەزيدەنت ءسوزىنىڭ تولىق نۇسقاسىن جاريالادى. جەردى شەتەلدىكتەرگە جالعا بەرۋ مەن ساتۋ ماسەلەسى توڭىرەگىندە تۋعان داۋعا بايلانىستى پرەزيدەنت ناقتى بىرنەشە شەشىم قابىلداعانى حابارلاندى.

توقايەۆ جەر ماسەلەسىنىڭ ەرەكشە ماڭىزدى ەكەنىن اتاپ ءوتىپ، قازاق جەرىنىڭ شەتەلدىكتەرگە ساتىلمايتىنى تۋرالى بۇعان دەيىن دە بىرنەشە مارتە مالىمدەگەنىن ەسكە سالدى.

– بۇل ماسەلەگە قاتىستى قاۋەسەتتەردى توقتاتۋ قاجەت. سوندىقتان مەن مىناداي ناقتى شەشىمدەر قابىلدادىم.

بىرىنشىدەن، شەتەلدىكتەرگە جانە شەتەلدىك زاڭدى تۇلعالارعا  اۋىل شارۋاشىلىعى جەرلەرىن ساتۋعا، جالعا بەرۋگە زاڭ جۇزىندە ءبىرجولا تىيىم سالۋدى تاپسىرامىن. بۇل شەتەلدىكتەردىڭ ۇلەسى بار زاڭدى تۇلعالارعا دا قاتىستى. مەن مۇنى پرەزيدەنتتىڭ زاڭ شىعارۋ باستاماسى ارقىلى جەدەل تۇردە جۇزەگە اسىرۋ قاجەت دەپ شەشتىم. پرەزيدەنت اكىمشىلىگى ءدال وسى ماسەلەگە بايلانىستى ءتيىستى زاڭ جوباسىن ازىرلەۋى كەرەك.

ەكىنشىدەن، ءبىر ايدىڭ ىشىندە جەر رەفورماسى جونىندەگى كوميسسيانى قۇرىپ، 25 ناۋرىزدا جۇمىسقا كىرىسۋدى تاپسىرامىن. كوميسسيانىڭ قۇرامىنا اگرارلىق سەكتوردىڭ بەدەلدى وكىلدەرىن جانە جەر ماسەلەسىن جەتىك بىلەتىن ساراپشىلاردى قوسۋ كەرەك.

ۇشىنشىدەن، ۇكىمەتكە بيىلعى تامىز ايىنىڭ سوڭىنا دەيىن جەر رەفورماسىنىڭ نەگىزگى ماسەلەلەرى بويىنشا ورتاق مامىلە ارقىلى تۇبەگەيلى بايلام جاساۋدى تاپسىرامىن.

تورتىنشىدەن، كوميسسيا جۇمىسىنىڭ ءاربىر كەزەڭى جانە وندا ۇسىنىلعان شارالار تۋرالى حالىقتى ۇنەمى حاباردار ەتىپ وتىرۋ كەرەك. باستى مىندەتتىڭ ءبىرى – كوميسسيا جۇمىسىنىڭ جانە شەشىم قابىلداۋدىڭ مەيلىنشە اشىقتىعىن كورسەتۋ. ەڭ باستىسى، جەر شەتەلدىكتەرگە ساتىلمايتىنى تۋرالى تۇبەگەيلى شەشىم قابىلداندى، – دەدى ول.