قازاقستان باس پروكۋرورىنىڭ ورىنباسارى بولات دەمبايەۆ 28 اقپان كۇنى ميتينگ وتكىزگەلى وتىرعان بەلسەندىلەردىڭ ارەكەتى زاڭسىز ەكەنىن ايتىپ، ۇندەۋ جولدادى.

– الەۋمەتتىك جەلىلەردە جەكەلەگەن تۇلعالار ەلدىڭ ءارتۇرلى ايماقتارىندا زاڭسىز ميتينگىلەر مەن شەرۋلەرگە قاتىسۋعا شاقىرۋلار تاراتۋدا.

وسىعان بايلانىستى، باس پروكۋراتۋرا ميتينگىلەردى ۇيىمداستىرۋ جانە وتكىزۋ ءتارتىبى 2020 جىلعى 25 مامىردا قابىلدانعان "قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى" جاڭا زاڭمەن رەتتەلەتىنىن تۇسىندىرەدى. بۇل زاڭ ەلدە بەيبىت جينالىستاردى ۇيىمداستىرۋ مەن وتكىزۋدى دەموكراتيالاندىرىپ، جەڭىلدەتتى. ناقتى ايتقاندا، جينالىستار، ميتينگىلەر مەن پيكەتتەردى ۇيىمداستىرۋ جانە وتكىزۋ ءۇشىن حابارلاما جاساۋ ءتارتىبى قاراستىرىلعان. 

ولاردى وتكىزۋ تۋرالى حابارلاما بەلگىلەنگەن كۇنگە دەيىن 5 جۇمىس كۇنىنەن كەشىكتىرىلمەي جەرگىلىكتى اتقارۋشى ورگانعا جازباشا نىساندا بەرىلەدى.

وندا بەيبىت جينالىستىڭ ماقساتى مەن نىسانى، ۇيىمداستىرۋشىلار مەن قوعامدىق ءتارتىپتى ساقتاۋعا جاۋاپتى ادامداردىڭ دەرەكتەرى كورسەتىلەدى، – دەدى دەمبايەۆ.

ونىڭ ايتۋىنشا، اتالعان حابارلامانى جەرگىلىكتى اتقارۋشى ورگان تىركەگەن كۇننەن باستاپ 3 جۇمىس كۇنى ىشىندە قاراۋعا ءتيىس. وسى 3 كۇن وتكەننەن كەيىن جاۋاپ بولماعان جاعدايدا، ۇيىمداستىرۋشى بەرىلگەن حابارلاماعا سايكەس بەيبىت جينالىس وتكىزۋگە قۇقىلى.

– دەمونستراسيالار مەن شەرۋلەر كەلىسۋ تارتىبىمەن وتكىزىلەدى. ول ءۇشىن ۇيىمداستىرۋشى ونىڭ وتكىزىلەتىن كۇنىنە دەيىن 10 جۇمىس كۇن بۇرىن ءوتىنىش بەرۋگە، ال جەرگىلىكتى اتقارۋشى ورگان ول بويىنشا 7 جۇمىس كۇنى ىشىندە جاۋاپ بەرۋگە مىندەتتى. ۇيىمداستىرۋشى وتىنىشتە قاتىسۋشىلاردىڭ ءجۇرۋ باعىتىن، سونداي-اق قوعامدىق ءتارتىپتى ساقتاۋدى، مەديسينالىق كومەكتى ۇيىمداستىرۋدى، ءورت قاۋىپسىزدىگىن قامتاماسىز ەتۋگە جاردەمدەسۋ شارالارىن كورسەتەدى، – دەدى ول.

باس پروكۋروردىڭ ورىنباسارى زاڭ بويىنشا بەيبىت جينالىستار قاتاڭ تۇردە ارنايى جەرلەردە جانە قالالىق، اۋداندىق ءماسليحاتتار بەلگىلەگەن مارشرۋت بويىنشا ۇيىمداستىرىلۋعا جانە وتكىزىلۋگە ءتيىس ەكەنىن ەسكەرتتى.

– زاڭدى (3-باپتىڭ 3-تارماعىن) بۇزا وتىرىپ جۇرگىزىلەتىن بەيبىت جينالىستاردى ۇيىمداستىرۋ جانە وعان قاتىسۋ قۇقىققا قايشى جانە اكىمشىلىك قۇقىق بۇزۋشىلىق تۋرالى كودەكستىڭ 488-بابى ((25 تاۋلىككە دەيىن قاماۋعا الۋ) بويىنشا اكىمشىلىك جاۋاپتىلىققا تارتىلادى.

ەگەر بۇل ارەكەتتەر ازاماتتاردىڭ، ۇيىمداردىڭ، قوعامنىڭ نەمەسە مەملەكەتتىڭ قۇقىقتارى مەن زاڭدى مۇددەلەرىنە ەلەۋلى زيان كەلتىرۋمەن قاتار جۇرەتىن بولسا، قىلمىستىق كودەكستىڭ 400-بابى بويىنشا قىلمىستىق جاۋاپتىلىق تۋىندايدى، ول ايىپپۇل نە 200 اەك-كە دەيىنگى مولشەردە تۇزەۋ جۇمىستارى نەمەسە 200 ساعاتقا دەيىنگى مەرزىمگە قوعامدىق جۇمىستارعا تارتۋ نە 50 تاۋلىككە دەيىنگى مەرزىمگە قاماۋ تۇرىندەگى جازانى كوزدەيدى، – دەدى دەمبايەۆ.

باس پروكۋراتۋرا ازاماتتاردى قولدانىستاعى زاڭناما نورمالارىن مۇلتىكسىز ساقتاۋعا، ارانداتۋشىلىققا بوي الدىرماۋعا جانە زاڭسىز اكسيالارعا قاتىسۋدان باس تارتۋعا شاقىردى.