ارمەنيادان اكەلىنگەن كولىكتەردى تىركەۋ مەرزىمى تاعى 1 ناۋرىزعا دەيىن ۇزارتىلدى. بۇل تۋرالى ىشكى ىستەر مينيسترلىگى مالىمدەدى.
مينيسترلىك حابارلاۋىنشا، قازاقستاندا 2020 جىلدىڭ 1 اقپانىنا دەيىن ارمەنيادان اكەلىنگەن جانە تىركەۋ شارتتارى دۇرىس 20 مىڭنان اسا كولىك ەسەپكە قويىلعان. كولىگىن تىركەي الماعان مىڭنان اسا جۇرگىزۋشى دە بار.
"كۇردەلى ەپيدەميولوگيالىق جاعداي مەن كارانتين شەكتەۋلەرىنىڭ ۇزاققا سوزىلۋىنا بايلانىستى ەنگىزىلگەن مەملەكەتتىك شەكارانى كەسىپ ءوتۋ شەكتەۋلەرىنەن اۆتوكولىكتى ارمەنياعا كەرى اكەتۋ پروبلەمالارى تۋىندادى. كەيبىر اۆتوكولىك يەسى دە كارانتينگە بايلانىستى قايتا جابدىقتالعان اۆتوكولىگىن زەرتحانالاردا ۋاقىتىلى سىناقتان وتكىزە المادى، سەبەبى ولار كەي وڭىردە جۇمىس ىستەمەيدى" دەلىنگەن حابارلامادا.
ۇكىمەت مۇنداي كولىكتەردى تىركەۋ مەرزىمىن 2022 جىلدىڭ 1 ناۋرىزىنا دەيىن ۇزارتتى. قازاقستاندا تىركەۋدەن وتكەن وسىنداي اۆتوموبيل يەلەرىن ارمەنيادا سالىقتان بوساتۋ تۋرالى ۇكىمەتارالىق كەلىسىم ىشكى جانە مەملەكەتارالىق راسىمدەردەن ءوتىپ جاتىر. بۇل شارالار اۆتوكولىك يەلەرى ءۇشىن (ارمەنيا مەن قازاقستاندا) "ەكى رەت" سالىق تولەۋدەن بوساتۋعا باعىتتالعان.
پىكىر قالدىرۋ