28 اقپاندا ازاتتىق راديوسىنىڭ ءتىلشىسى قازيس توعىزبايەۆ 72 جاسىندا الماتىداعى كوروناۆيرۋس اۋرۋحاناسىندا قايتىس بولدى. بۇل تۋرالى ازاتتىق راديوسى حابارلادى.
سايت مالىمەتىنشە، قازيس توعىزبايەۆتان كوروناۆيرۋس 25 قاڭتاردا انىقتالىپ، اۋرۋحاناعا جاتقىزىلعان. ءجۋرناليستى 22 اقپاندا كلينيكادان شىعارعانىمەن، كەيىن ءحالى اۋىرلاپ قايتا اۋرۋحاناعا جەتكىزىلگەن. ال جەكسەنبىدە جاقىندارى ونىڭ جۇرەگى توقتاعانىن حابارلادى.
ول 2008 جىلدىڭ قىركۇيەگىنەن بەرى ازاتتىق راديوسىنىڭ قازاق قىزمەتىندە ءتىلشى رەتىندە جۇمىس ىستەدى.
زاپاستاعى پولكوۆنيك قازيس توعىزبايەۆ اسكەري قىزمەتىنەن سوڭ جۋرناليستيكاعا، فوتوگرافياعا بەت بۇردى. وپپوزيسيالىق "ءسوز" جانە "ازات" گازەتتەرىندە قىزمەت ەتتى. kub.info سايتىندا بلوگ جۇرگىزىپ، الماتى ماڭىنداعى شاڭىراق اۋدانىنان جۇرتتى كۇشتەپ كوشىرۋ جايلى فوتورەپورتاجدار جاريالادى.
ونى ارىپتەستەرى كاسىبيلىگى مەن جاسىن سىيلاپ "قازيس اعا" دەيتىن. اسكەري ءتارتىپ پەن تىك مىنەزى، شىنشىلدىعى، سەنىمدىلىگى جانە جايساڭدىعى ارىپتەسىمىزدىڭ رۋحتى ادام ەكەنىن ايقىنداپ تۇراتىن.
قازيس توعىزبايەۆ 2007 جىلى قاڭتاردا قازاقستانداعى دەموكراتيالىق قۇندىلىقتاردى دامىتۋعا قوسقان ۇلەسى ءۇشىن "ازاتتىق" سىيلىعىمەن ماراپاتتالدى. ول ازاتتىقتىڭ قازاق قىزمەتىندە كوبىنە ساياسي، ادام قۇقىعى، اسكەري تاقىرىپتارىن جازدى. ازاتتىق رەداكسياسى قازيس اعاعا اۋىر ساياسي تاقىرىپتاردى تاپسىراتىن. ول ءارقاشان سەنىمدى اقتاپ، تولىمدى ماقالالار جولدايتىن.
قازيس توعىزبايەۆ – 2011 جىلى جەلتوقساندا جاڭاوزەنگە بارىپ، سول جاقتاعى وقيعادان العاش بولىپ بارعان جۋرناليست. 2011 جىلى جەلتوقساندا بولعان جاڭاوزەندەگى مۇنايشىلار ەرەۋىلىندە پوليسيا نارازىلارعا وق اتىپ، رەسمي دەرەك بويىنشا 17 ادام قايتىس بولدى. قازيس اعا ماڭعىستاۋ وبلىسىنان وبەكتيۆتى رەپورتاجدار تاراتىپ، جاڭاوزەندە نە بولىپ جاتقانىن دەر كەزىندە حابارلاپ وتىردى.
قازيس اعانىڭ "زامانبەك ءنۇرقادىلوۆتىڭ ءولىمى. ءۇش رەت اتىلعان وق جانە رەجيمدى ساقتاپ قالۋ جولى"، "ارون اتابەكتىڭ قاپاستا وتكىزگەن 14 جىلداعى العاشقى ءوتىنىشى"، "سايلاۋدان كەيىنگى ءبىر جىل. توقايەۆ نازاربايەۆتىڭ كولەڭكەسىنەن شىعا الدى ما؟"، "سوۆەت كەزىندە قۋعىندالىپ، نازاربايەۆ تۇسىندا ديسسيدەنتكە اينالعان كارىشال اسانوۆ" سىندى ماقالالارىن وقىرمان تاراپىنان كوپ وقىلىپ، كوپ تالقىلاندى.
پىكىر قالدىرۋ