ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا جوعارى وقۋ ورىندارىندا قاشىقتان وقىتۋ كەزىندە ساباق وتپەي، ستۋدەنتتەر ساباققا قاتىسپاي ەمتيحان تاپسىرىپ باعا السا، قانداي شارا قولدانىلاتىنىن ايتتى.
– جوو-دا جەمقورلىققا قارسى ءبىراز شارالار قابىلداندى. سونىڭ ىشىندە نورماتيۆتىك-قۇقىقتىق قۇجاتتاردىڭ ىشىندە دە بەلگىلەندى. ەڭ باستىسى جوعارى وقۋ ورىندارىندا ادالدىق-اكادەميالىق قاعيدالارى ساقتالۋى كەرەك. سول كەزدە عانا وقۋ ۇلگەرىمى دە جاقسى بولادى. ستۋدەنتتەر ساباققا دا قاتىسىپ، ەمتيحاندارىن دا ۋاقىتىلى تاپسىرادى.
بۇگىندە وقۋ پروسەسى سيفرلاندىرىلىپ جاتىر. سوندىقتان ەكى ەسەگە دەيىن جاۋاپكەرشىلىك ارتا تۇسەدى. ستۋدەنتتەر دە وقۋعا مىندەتتى بولادى. بيىل جەمقورلىققا قارسى تاپسىرما بەرىلدى. ەگەر دە ساباققا قاتىسپاي ەمتيحان تاپسىرىپ باعا الۋ فاكتىسى انىقتالسا، زاڭ جۇزىندە قاراستىرىلىپ، ۋنيۆەرسيتەت ليسەنزياسىنان ايىرىلادى، – دەدى گ. كوبەنوۆا.
سونداي-اق ءبىلىم جانە عىلىم ۆيسە-مينيسترى شولپان كارينوۆا مەكتەپ وقۋشىلارىنىڭ ارالاس وقىتۋ فورماتىنا كوشۋىنە بايلانىستى مەكتەپ فورماسى ماسەلەسىن ءتۇسىندىردى.
– اتا-انالاردى مازالاپ جاتقان تاعى ءبىر ۇلكەن ماسەلە – مەكتەپ فورماسى. وسى وقۋ جىلىنىڭ باسىندا ءتيىستى بۇيرىق شىعارىلىپ، تولىق وقۋ جىلىندا مەكتەپ فورماسىن ساقتاماۋ بويىنشا ۇستانىم قابىلدانعان بولاتىن. وقۋشىلاردىڭ ارالاس فورماتقا اۋىسۋىنا بايلانىستى تاعى قايتالاپ ايتامىز، مەكتەپ فورماسىن ساتىپ الۋدىڭ قاجەتى جوق. وقۋشىلار وزدەرىنە لايىقتى، تازا، ۇقىپتى كيىممەن مەكتەپتەگى ساباقتارعا قاتىسا الادى، – دەدى ۆيسە-مينيستر.
پىكىر قالدىرۋ