الەۋمەتتىك جەلىدە "ۋچاسكەلىك پوليسەي بولىپ جۇمىس ىستەيتىن باۋىرىم قىزمەت بارىسىندا شاتىردان قۇلاپ، اۋىر جاراقات الدى. الماتى اكىمى باقىتجان ساعىنتايەۆتان كومەك سۇرايمىن" دەگەن ايەلدىڭ بەينەۇندەۋى تارالىپ جاتىر.

بەينەۇندەۋدەگى ايەلدىڭ ايتۋىنشا، وقيعا 28 اقپاندا الماتى قالاسى الاتاۋ اۋدانى زەردەلى ىقشاماۋدانىندا بولعان. قۇرىلىسى بىتپەگەن ۇيلەردىڭ توبەسىندە بالالاردىڭ ويناپ جۇرگەنى تۋرالى اقپارات العان كەزەكشىلىكتە بولعان ۋچاسكەلىك پوليسيا قىزمەتكەرى حالمىرزايەۆ تەمىربەك بالالارعا تومەنگە ءتۇسۋىن، بۇل وينايتىن الاڭ ەمەس ەكەنىن تۇسىندىرگەن. الايدا قىزمەتتىك مىندەتتەرىن اتقارۋ بارىسىندا ءوزى جوعارى قاباتتان قۇلاپ، بۇگىندە اۋىر حالدە جاتىر.

"سوعان بايلانىستى، سىزدەن باقىتجان ساعىنتايەۆ مىرزا، قانداي دارىگەر مامانداردىڭ كومەگى قاجەت ەكەنىن انىقتاپ، ومىرىنە اراشا ءتۇسۋىڭىزدى سۇرايمىن. ارتىندا 3 بالاسى، اياعى اۋىر ايەلى، 80 كەلىپ قالعان قارت اناسى اللادان امان قالۋىن تىلەۋدە. سونداي-اق بىرنەشە جىلدان بەرى ءۇيدى بىتىرمەگەن قۇرىلىس مەكەمەسى باسشىلىعىن جاۋاپقا تارتۋىڭىزدى سۇرايمىن. تۇرعىنداردىڭ ايتۋىنشا، وسى مەكەنجايدا بۇعان دەيىن بىرنەشە ادام قۇلاپ مەرت بولعان. وسىعان بەيجاي قاراعان الاتاۋ اۋدانى اكىمىن جانە وعان جاۋاپتى تۇلعالاردى جاۋاپقا تارتۋىڭىزدى وتىنەمىن" دەلىنگەن ايەلدىڭ بەينەۇندەۋىندە.

الماتى قالاسى پوليسيا دەپارتامەنتى يۋۆەنالدىق پوليسيا قىزمەتكەرى 16-17 جاستاعى جاسوسپىرىمدەرمەن پروفيلاكتيكالىق اڭگىمە بارىسىندا اياعى تايىپ، تومەنگى قاباتقا قۇلاپ كەتكەنىن راستاپ، ونىڭ جاعدايى تۋرالى ءمالىم ەتتى.

"بۇگىندە پوليسەيگە وتا جاسالدى، الايدا ونىڭ جاعدايى ءالى دە اۋىر.  كامەلەتكە تولماعانداردىڭ اتا-اناسىنا اكىمشىلىك كودەكستىڭ 127-بابى (كامەلەتكە تولماعان ادامدى تاربيەلەۋ جانە وعان ءبىلىم بەرۋ، ونىڭ قۇقىقتارى مەن مۇددەلەرىن قورعاۋ جونىندەگى مىندەتتەردى ورىنداماۋ) بويىنشا حاتتاما تولتىرىلدى. جاسوسىپىرىمدەر زارداپ شەككەن جوق" دەلىنگەن دەپارتامەنت حابارلاماسىندا.