ءماجىلىس ءتوراعاسى نۇرلان نىعماتۋلين تەمەكى ونىمدەرىنە ارنالعان اكسيزدەر مولشەرلەمەلەرىن ايقىنداۋ كەزىندە نارىقتىڭ وزگەرۋىنە جەدەل دەن قويۋ قازاقستاننىڭ مۇددەلەرىن ساقتاۋعا دا، ەاەو-تىڭ ءتيىستى كەلىسىمى شەڭبەرىندە ەلىمىزدىڭ مىندەتتەمەلەرىن ورىنداۋعا دا ىقپال ەتەدى دەپ ەسەپتەيدى.

بۇگىن ءماجىلىستىڭ جالپى وتىرىسىندا «ەۋرازيالىق ەكونوميكالىق وداققا مۇشە مەملەكەتتەردىڭ تەمەكى ونىمدەرىنە اكسيزدەر سالاسىنداعى سالىق ساياساتىن جۇرگىزۋ قاعيداتتارى تۋرالى كەلىسىمدى راتيفيكاسيالاۋ تۋرالى» زاڭ جوباسى ماقۇلداندى.

كەلىسىمگە سايكەس 2024 جىلدان باستاپ ەاەو ەلدەرى تەمەكىگە 1 مىڭ دانا ءۇشىن 35 ەۋرو ينديكاتيۆتىك مولشەرلەمەنى تيىسىنشە 20%-عا اۋىتقۋ قۇقىعىمەن قولدانۋعا ءتيىس.

بۇل رەتتە تەمەكى ونىمدەرىنە اكسيزدەردى كەزەڭ-كەزەڭىمەن ۇيلەستىرۋ كوزدەلەدى.

وسى زاڭ جوباسىن تالقىلاۋ بارىسىندا ءماجىلىس ءتوراعاسى نۇرلان نىعماتۋلين ەگەر ۇلتتىق ۆاليۋتانىڭ ەۋروعا قاتىستى باعامى وزگەرسە بۇل تەمەكىگە اكسيزدىڭ مولشەرلەمەسىنە، سونداي-اق بولشەك ساۋدا باعالارىنا قالاي اسەر ەتەتىنىنە كوڭىل ءبولۋ كەرەكتىگىن ايتتى. 

ۇلتتىق ەكونوميكا ءمينيسترى اسەت ەرعالييەۆ تۇسىندىرگەندەي، باعام كۇرت وزگەرگەن جاعدايدا ەاەو-عا مۇشە ەلدەردىڭ ءارقايسىسى اكسيزدەردىڭ ينديكاتيۆتىك مولشەرلەمەسىن قايتا قاراۋدى سۇراپ، ەۋرازيالىق ەكونوميكالىق كوميسسياعا جۇگىنۋگە قۇقىقى بار جانە شەشىم تولىق كونسەنسۋسقا قول جەتكىزىلگەن كەزدە، ياعني ەاەو-نىڭ بارلىق مۇشەلەرى كەلىسەتىن كەزدە قابىلدانادى.

وسىعان وراي، نۇرلان نىعماتۋلين بۇل جەردە كوپ جاعداي ۇلتتىق ەكونوميكا مينيسترلىگى قىزمەتكەرلەرىنىڭ، سونداي-اق، ەۋرازيالىق ەكونوميكالىق وداق كوميسسياداعى وكىلدەردىڭ، ولاردىڭ كۋرستىڭ بارلىق وزگەرىستەرىنە جەدەل ىس-ارەكەت ەتۋلەرىنە بايلانىستى بولاتىنىن اتاپ ءوتىپ، وسى كەلىسىم شەڭبەرىندە قازاقستاننىڭ مۇددەسىن، ەلىمىزدىڭ مىندەتتەمەلەرىن دە ساقتاۋ ماقساتىندا ۋاقىتىلى شارالار قابىلداۋ قاجەتتىگىن ايتتى.

جالپى، زاڭ جوباسى تەمەكى ونىمىنە ارنالعان اكسيزدەر مولشەرلەمەلەرىن ۇيلەستىرۋ جولىمەن ەاەو شەڭبەرىندە تەمەكى ونىمدەرى نارىعىنىڭ جۇمىس ىستەۋى ءۇشىن جاعدايلاردى قامتاماسىز ەتۋگە باعىتتالعان. بۇل تەمەكى ونىمدەرىنىڭ زاڭسىز اينالىمىن تەجەۋگە مۇمكىندىك بەرەدى.

 ءماجىلىستىڭ باسپا ءسوز قىزمەتى