الماتىداعى "راحات" بازارىندا جۇمىس ىستەيتىن كاسىپكەرلەر نارازىلىق اكسياسىن وتكىزدى. ايتۋلارىنشا، الماتى قالاسى اكىمدىگى جانىنداعى جەر كوميسسياسى "راحات" بازارىن باسقارۋشى "تكم" كومپانياسىنا ساۋدا بۋتيكتەرى ورنالاسقان جەردى جالعا بەرۋ مەرزىمىن ۇزارتۋدان باس تارتىپ، استانادا تىركەلگەن "الماتى سرS" فيرماسىنا جيھاز فابريكاسىن سالۋ ءۇشىن 5 جىلعا جالعا بەرگەن. سونىڭ سالدارىنان ونداعان جىلدار بويى سالىق تولەپ، بيزنەستەرىنىڭ نەگىزىن قالاعان 300-گە جۋىق شاعىن كاسىپكەرگە جەپ وتىرعان نانىنان ايىرىلۋ ءقاۋپى ءتونىپ تۇر.

كاسىپكەرلەر الماتى قالاسى اكىمدىگى جانىنداعى جەر كوميسسياسى جەردى "ۋچاسكە زيراتتىڭ سانيتارلىق-قورعاۋ ايماعىندا ورنالاسقان" دەگەن نەگىزبەن 2018 جىلى ۇزارتۋدان باس تارتقانىن ايتادى. الايدا ۇزاماي جەردى "الماتى سرS"-كە بەرۋ تۋرالى شەشىم شىققان. جيھاز فابريكاسىن سالعىسى كەلەتىن تاراپتىڭ ءوتىنىشى جەر كوميسسياسىندا بار بولعانى 3 كۇندە قارالعان.

– ادەتتە جەردى جالعا الۋ شارۋاسى زاڭدا بەكىتىلگەندەي 2 ايدا بىتپەيدى، ايلاپ، جىلداپ سوزىلادى. ال "الماتى سرS"ء-تىڭ ءوتىنىشى 3-اق كۇندە قارالادى ەكەن. بۇل قالاي؟، –  دەگەن شاعىن كاسىپ يەلەرى داۋدىڭ ارتىندا ىقپالدى ادامدار تۇر دەپ سانايدى.

سونىمەن قاتار نارازى توپ جەر ينۆەستيسيالىق جوبانى جۇزەگە اسىرۋ ماقساتىندا بەرىلگەنىن جەتكىزىپ، "ينۆەستيسيالىق جوبانىڭ بازارعا قانداي قاتىسى بار جانە زاماناۋي ساۋدا ورتالىعىن بۇل جەردى بۇرىنان باسقارىپ كەلە جاتقان كومپانيا دا ىسكە اسىرا الادى" دەپ اشىنادى.

ولاردىڭ سوزىنشە، مەملەكەتتىك مەنشىكتەگى جەردى ينۆەستيسيالىق جوبانى جۇزەگە اسىرۋ ماقساتىندا بەرۋ ماسەلەسى ايماقتىق ۇيلەستىرۋ كەڭەسىندە قارالۋعا ءتيىس. "الماتى سرS"ء-تىڭ جوباسى كەڭەستە قارالماعان.

كاسىپكەرلەردىڭ كوڭىلىندەگى كەزەكتى كىلتيپان – "باراحولكىدەگى 25-تەن استام بازار، ساۋدا ورتالىعى ورنالاسقان ايماقتا فابريكا سالۋدىڭ قاجەتتىلىگى بار ما؟" دەگەن ماسەلە.

زيراتتىڭ سانيتارلىق-قورعاۋ ايماعى، قاراسۋ وزەنىنىڭ سۋ-قورعاۋ ايماعىندا ءوندىرىس وبەكتىسىن سالۋ سنيپ تالاپتارىنا سايكەس پە؟ ءوندىرىس وبەكتىلەرى ءۇشىن بولىنگەن يندۋستريالدىق ايماقتا جيھاز فابريكاسىنا ورىن تابىلمادى ما؟ الدە، بۇل بيزنەستى رەيدەرلىك جولمەن تارتىپ الۋدىڭ قيتۇرقى ءتاسىلى مە؟ بۇل جاعى ازىرگە بەلگىسىز.

كاسىپكەرلەر، مەملەكەتتىك اتقارۋشى ورگاندار جەردى "تكم" جشس-نەن الىپ، "الماتى سرS"-كە بەرگەندە 300-دەن استام ادامنىڭ مۇددەسى مۇلدە نازاردان تىس قالدىرىپ وتىرعانىن ايتادى.

– قابىلداعان شەشىمدەرى قيسىنعا كەلمەيتىن، زاڭعا قايشى بولسا دا، الماتى قالاسى مامانداندىرىلعان ەكونوميكالىق سوتىنىڭ ارەكەتى كۇماندى. "تكم" ءجشس-نىڭ تالاپتارى بويىنشا بارلىق ىستەر ءبىر عانا سۋديا قازىمبەتوۆانىڭ قاراۋىنا ءتۇسىپ وتىرعان. ىستەردى اۆتوماتتى ءبولۋ جۇيەسى سانالى تۇردە ءبىر عانا سۋدياعا ءبولۋى كۇمان كەلتىرەدى. بارلىق ىستەر بويىنشا بازاردىڭ ءىسى 3 جىل بويى ءبىر عانا سۋديانىڭ الدىنا كەلىپ، ول تالاپتاردى قاناعاتتاندىرۋسىز قالدىرۋ تۋرالى شەشىم قابىلداۋمەن كەلەدى، – دەيدى نارازىلىق اكسياسىنا جينالعاندار.

كاسىپكەرلەر بۇل ىستە كونستيتۋسيا، جەر كودەكسى، كاسىپكەرلىك كودەكسىنىڭ تالاپتارى مەن ۇكىمەتتىڭ وزگە قاۋلىلارى ەسكەرىلمەي كەلەدى دەپ وتىر.