1 ناۋرىزدا قازاقستان ساۋدا جانە ينتەگراسيا ۆيسە-مينيسترى قايرات تورەبايەۆ پەن جۇڭگو كوممەرسيا ۆيسە-مينيسترى ۆان شوۋۆەن كەزدەستى. بۇل تۋرالى ساۋدا جانە ينتەگراسيا مينيسترلىگىنىڭ باسپا ءسوز قىزمەتى حابارلادى.

ۆەدومستۆو مالىمەتىنشە، قوس تاراپ قازاقستان-قىتاي "قورعاس" شەكارا ماڭى ىنتىماقتاستىعى حالىقارالىق ورتالىعىنىڭ قىزمەتىن ۇيلەستىرۋ تەتىگىنىڭ 2-وتىرىسىنا دايىندىق بويىنشا كەلىسسوزدەر جۇرگىزگەن.

قايرات تورەبايەۆ قازاقستان مەن قىتايدىڭ ساۋدا-ەكونوميكالىق قاتىناستارى قارقىندى سيپاتقا يە ەكەنىن اتاپ وتكەن.

– جۇڭگو قازاقستاننىڭ ەڭ ءىرى ينۆەستورلارىنىڭ بەستىگىنە كىرەدى. قازاقستانعا قۇيىلعان بارلىق ينۆەستيسيانىڭ 4،7 پايىزىن قۇرايدى. 2005-2020 جىلدار ارالىعىندا جۇڭگو قازاقستانعا 19،2 ملرد دوللار ينۆەستيسيا قۇيدى.

يندۋستريالىق-ينۆەستيسيالىق ىنتىماقتاستىق باعدارلاماسى اياسىندا 24،5 ملرد دوللارعا 56 زاماناۋي كاسىپورىن سالۋ جوسپارلانىپ وتىر. بۇل نىسانداردىڭ باسىم بولىگى 2023 جىلعا قاراي اياقتالادى دەپ كۇتىلۋدە، – دەدى قايرات تورەبايەۆ.

ونىڭ ايتۋىنشا، قازىرگى ۋاقىتتا "قورعاس" شەكارا ماڭى ىنتىماقتاستىعى حالىقارالىق ورتالىعىنىڭ قازاقستان اۋماعىندا جالپى سوماسى 110،37 ملرد تەڭگەگە 29 ينۆەستيسيالىق جوبانى ىسكە اسىرۋ بويىنشا 24 ينۆەستيسيالىق كومپانيا ءوز قىزمەتىن جۇزەگە اسىرىپ جاتىر. شامامەن 30 000 شارشى مەترى پايدالانۋعا بەرىلدى، 1 جوبا 100 پايىزعا ىسكە اسىرىلدى. 12 جوبا بويىنشا قۇرىلىس جۇمىستارى جۇرگىزىلۋدە، ال قالعاندارى جوبالانىپ جاتىر.