جاس مامانداردى مەكتەپ جۇمىسىنا ىنتالاندىرۋ ءۇشىن "پەداگوگ-مودەراتور" بىلىكتىلىك ساناتىن بەرۋدىڭ جەڭىلدەتىلگەن ءتارتىبى ەنگىزىلدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ءماجىلىس دەپۋتاتتارىنىڭ ساۋالىنا بەرگەن  جاۋابىندا ايتىلعان.

– دارىندى جاستاردى پەداگوگيكالىق ماماندىققا تارتۋ ماقساتىندا ءمۇعالىمنىڭ مارتەبەسىن كوتەرۋ ءۇشىن ءتيىستى جۇمىس جالعاستىرىلۋدا. پەداگوگيكالىق باعىت بويىنشا وقۋعا تۇسۋگە قويىلاتىن تالاپتار بىرتىندەپ كۇشەيتىلۋدە. وسىلاي 2020 جىلى وقۋعا ءتۇسۋ بالى 60-تان 70 بالعا دەيىن كوتەرىلدى، ارنايى ەمتيحان مازمۇنى وزەكتەندىرىلدى.

پەداگوگيكالىق جوعارى وقۋ ورىندارىندا وقيتىن ستۋدەنتتەردىڭ ستيپەندياسى ۇلعايتىلدى (26 186-نان 42 000 تەڭگەگە دەيىن). مەكتەپ مۇعالىمدەرىنىڭ ەڭبەكاقىسى ءوستى. مەكتەپ وقۋشىلارى اراسىندا كاسىپتىك باعدار بەرۋ جۇمىسىن جۇرگىزۋ ءۇشىن جوعارى وقۋ ورىندارى ءبىلىم باسقارمالارىمەن، مەكتەپتەرمەن ءوزارا ءىس-قيمىل جاسايدى، – دەدى ايماعامبەتوۆ.

ونىڭ ايتۋىنشا، قازىرگى ۋاقىتتا بارلىق ءبىلىم بەرۋ باعدارلامالارى پەداگوگتىڭ كاسىبي ستاندارتىنا جانە جۇمىس بەرۋشىلەردىڭ تالاپتارىنا سايكەس جاڭارتىلعان. بۇل رەتتە پەداگوگيكالىق پراكتيكاعا ارنالعان ادىستەمەلىك ۇسىنىستار جاسالىنعان جانە وقىتۋدىڭ بارلىق كەزەڭىندە پراكتيكانى ۇيىمداستىرۋدى كوزدەيتىن ۇزدىكسىز پراكتيكالىق وقىتۋ جۇيەسى ەنگىزىلگەن.

"2018 جىلدان باستاپ پەداگوگتى اتتەستاتتاۋ راسىمدەرىنىڭ جاڭا فورماتى ەنگىزىلدى. وسىعان بايلانىستى مينيسترلىك نورماتيۆتىك قۇقىقتىق قۇجاتتارعا وزگەرىستەر ەنگىزۋ بويىنشا جۇمىس جۇرگىزدى. وعان سايكەس 2021 جىلدان باستاپ پەداگوگيكالىق جوعارى وقۋ ورىندارىنىڭ تۇلەكتەرى ءۇشىن ۇلتتىق بىلىكتىلىك تەستىلەۋىنەن مىندەتتى ءوتۋ نورماسى ەنگىزىلدى. اتالعان شارا تۇلەكتەردىڭ قۇزىرەتتىلىگىن راستاۋعا جانە ءبىلىم بەرۋ ۇيىمدارىن بىلىكتى جاس ماماندارمەن قامتاماسىز ەتۋگە مۇمكىندىك بەرەدى" دەلىنگەن مينيستر جاۋابىندا.

– تاجىريبە الماسۋ اياسىندا جوعارى وقۋ ورىندارى وقىتۋشىلارىنىڭ جاپپاي اشىق ونلاين كۋرستارىن ازىرلەپ، ءبىلىم بەرۋ پلاتفورمالارىنا ورنالاستىرۋعا مۇمكىندىكتەرى بار. سونىمەن قاتار، جوعارى وقۋ ورىندارى مەكتەپتەرمەن بىرلەسىپ ءوزارا تاجىريبەمەن الماسۋ جانە ستۋدەنتتەرگە يننوۆاسيالىق پەداگوگيكالىق تەحنولوگيالار مەن ادىستەردى ءتيىمدى وقىتۋ ماقساتىمەن كونسورسيۋم قۇردى.

قازىرگى ۋاقىتتا جوعارى وقۋ ورىندارى پەداگوگيكالىق قايتا دايارلاۋ باعدارلامالارىن ازىرلەۋ بويىنشا جۇمىس جۇرگىزۋدە. وسى باعىتتا مينيسترلىك جوعارى وقۋ ورىندارىنا پەداگوگيكالىق-پسيحولوگيالىق دايىندىقتى كۇشەيتۋ ءۇشىن پەداگوگيكالىق قايتا دايارلاۋ باعدارلامالارىنىڭ مازمۇنىن وزگەرتىپ، وقۋ ناتيجەلەرىن تۇزەتۋدى ۇسىندى، – دەدى مينيستر.

سونىمەن قاتار، جاس مامانداردى مەكتەپ جۇمىسىنا ىنتالاندىرۋ ءۇشىن شەتەلدىك جوعارى وقۋ ورىندارىن، "بولاشاق" باعدارلاماسىن، اعىلشىن تىلىندە پاندەردى وقىتۋ قۇقىعىمەن بىتىرۋشىلەر، سونداي-اق پرەزيدەنتتىك كادر رەزەرۆىنە كىرگەن ادامدار ءۇشىن "پەداگوگ-مودەراتور" بىلىكتىلىك ساناتىن بەرۋدىڭ جەڭىلدەتىلگەن ءتارتىبى ەنگىزىلگەن.

– وسىلايشا مينيسترلىك پەداگوگيكالىق ءبىلىم بەرۋ ساپاسىن ارتتىرۋ جانە مەكتەپتەردى جوعارى بىلىكتى مۇعالىمدەرمەن قامتاماسىز ەتۋ بويىنشا جۇيەلى، كەشەندى جۇمىستى جۇزەگە اسىرىپ جاتىر، – دەدى ول.