پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ءبىلىم بەرۋ سالاسىن جەتىلدىرۋدىڭ جۇيەلى ماسەلەلەرى قارالدى، دەپ حابارلادى primeminister.kz سايتى.
اقپاراتتىق حابارلامادا 2024 جىلعا قاراي پەداگوگتاردىڭ جالاقىسى مەن ستۋدەنتتەردىڭ شاكىرتاقىسى 2 ەسەگە ۇلعاياتىنى، 800 جاڭا مەكتەپ سالىنىپ، 5000 اۋىل مەكتەبى جاڭعىرتىلاتىنى ايتىلادى.
"كوللەدجدەردە 9-سىنىپ نەگىزىندە وقۋ تولىعىمەن تەگىن بولادى. كوللەدجدەردى بيزنەسكە سەنىمدى باسقارۋعا بەرۋ تاجىريبەسى جالعاسادى. ۋنيۆەرسيتەتتەردىڭ ءبىلىم بەرۋ باعدارلامالارى كاسىپتىك ستاندارتتار نەگىزىندە 100% جاڭارتىلادى. وتاندىق 20 جەتەكشى جوو وڭىرلەردىڭ ءوسۋ نىساناسىنا اينالادى. نازاربايەۆ ۋنيۆەرسيتەتىنىڭ تاجىريبەسى بويىنشا يننوۆاسيالار مەن جاڭا تەحنولوگيالاردى دامىتۋمەن اينالىساتىن ەكى وزىق جوو قۇرىلاتىن بولادى. جوعارى ءبىلىمنىڭ قولجەتىمدىلىگىن ارتتىرۋ ءۇشىن 2025 جىلعا دەيىنگى گرانتتار سانى 50%-عا ارتادى. جىل سايىن جاس عالىمدارعا 1000 گرانت بولىنەدى، ال 500 قازاقستاندىق عالىم الەمنىڭ تانىمال عىلىمي ورتالىقتارىندا تاعىلىمدامادان وتە الادى.
ءوڭىر اكىمدىكتەرىنە جەكە بالاباقشالار جەلىسىن دامىتۋ ەسەبىنەن 2021 جىلى 32 مىڭ ورىنعا دەيىن مەكتەپكە دەيىنگى ءبىلىم بەرۋ ورىندارىن اشۋدى قامتاماسىز ەتۋ، 200 جاڭا مەكتەپتى پايدالانۋعا بەرۋ، سونداي-اق قالالىق جانە اۋىلدىق مەكتەپتەردەگى وقىتۋ جاعدايلارىن تەڭەستىرۋ، ونىڭ ىشىندە اۋىلدىق جەرلەردە جوعارى بىلىكتى پەداگوگتاردى بەكىتۋ بويىنشا ناقتى شارالار قابىلداۋ تاپسىرىلدى" دەلىنگەن ۇكىمەت وتىرىسىنىڭ بارىسىنان ازىرلەنگەن حابارلامادا.
پىكىر قالدىرۋ