پاۆلوداردا دۇكەندى توناعان 22 جاستاعى كۇدىكتى جەرگىلىكتى پوليسيا ءبولىمىنىڭ قىزمەتكەرى بولىپ شىقتى. بۇل تۋرالى ratel.kz سايتى حابارلادى.
5 ناۋرىزدا Instagram-دا ەر ادام قارۋ كەزەنىپ، ايەل ادامنان كاسساداعى اقشانى بەرۋدى تالاپ ەتىپ تۇرعان ۆيدەو تاراعان. ارتىنشا وقيعا پاۆلودارعا جاقىن اۋىلدارداعى دۇكەندەردىڭ بىرىندە 1 ناۋرىزدا بولعانى انىقتالدى.
وبلىستىق پوليسيا دەپارتامەنتى باسپا ءسوز قىزمەتىنىڭ حابارلاۋىنشا، كۇدىكتى اۋىلداعى دۇكەندەردىڭ بىرىندەگى ساتۋشىنى زورلىق-زومبىلىق كورسەتەمىن دەپ قورقىتىپ، 120 مىڭ تەڭگە الىپ كەتكەن.
قازىرگى ۋاقىتتا پاۆلودار وبلىسىنىڭ 22 جاستاعى تۇرعىنى ۇستالىپ، قىلمىستىق كودەكستىڭ 192-بابى ("قاراقشىلىق") بويىنشا سوتقا دەيىنگى تەرگەۋ جۇرگىزىلىپ جاتىر.
ىشكى ىستەر مينيسترلىگى كولىكتەگى پوليسيا دەپارتامەنتى كۇدىكتى پوليسەي بولىپ جۇمىس ىستەيتىنىن حابارلادى. ول دۇكەندەردى توناۋعا قىزمەتتىك كولىگىمەن بارعان. سونداي-اق ول شابۋىلداعان "كەرەمەت" دۇكەنى اۋىل اكىمدىگىنە قاراما-قارسى ورنالاسقان.
تەرگەۋ اقپاراتىنا سايكەس، كۇدىكتى ويىن اۆتوماتىنا ۇتىلىپ، اقشا ىزدەگەن.
پوليسيا دەپارتامەنتىنىڭ باسپا ءسوز قىزمەتى ءىس بويىنشا ساراپتاما ءالى جالعاسىپ جاتقانىن مالىمدەدى.
پوسموترەت ەتۋ پۋبليكاسيۋ ۆ Instagram
