پرەمەر-مينيستردىڭ ورىنباسارى ەرالى توعجانوۆتىڭ توراعالىعىمەن الەۋمەتتىك ارىپتەستىك پەن الەۋمەتتىك جانە ەڭبەك قاتىناستارىن رەتتەۋ جونىندەگى رەسپۋبليكالىق ءۇشجاقتى كوميسسيانىڭ وتىرىسى ءوتتى. وتىرىسقا ق ر كاسىپوداقتار فەدەراسياسى مەن جۇمىس بەرۋشىلەر بىرلەستىكتەرىنىڭ وكىلدەرى، سونداي-اق ورتالىق جانە جەرگىلىكتى مەملەكەتتىك ورگانداردىڭ باسشىلارى قاتىستى، دەپ حابارلادى ۇكىمەتتىڭ رەسمي سايتى.

وتىرىس بارىسىندا ە. توعجانوۆ ورتالىق مەملەكەتتىك جانە جەرگىلىكتى اتقارۋشى ورگاندارعا ءبىرقاتار تاپسىرما بەردى، اتاپ ايتساق:

♦شتاتتاردى جانە ەڭبەكاقى تولەۋ شارتتارىن وڭتايلاندىرۋ بويىنشا قازاقستاننىڭ جۇمىس بەرۋشىلەرى ىسكە اسىراتىن شارالارعا كەشەندى تالداۋ جاساۋ؛

♦ ەڭبەكاقى تولەۋدىڭ ءبىرىڭعاي ستاندارتتارىن ەنگىزۋ ماسەلەسىن پىسىقتاۋ؛

♦ سالالىق ءۇشجاقتى كوميسسيالاردىڭ جۇمىسىن جانداندىرۋ.

"بۇدان بولەك، وتىرىس اياسىندا قازاقستان رەسپۋبليكاسىنىڭ ۇكىمەتى، جۇمىس بەرۋشىلەردىڭ رەسپۋبليكالىق بىرلەستىكتەرى مەن كاسىپوداقتاردىڭ رەسپۋبليكالىق بىرلەستىكتەرى اراسىندا 2021-2023 جىلدارعا ارنالعان باس كەلىسىمگە قول قويىلدى. جاڭا باس كەلىسىمدە قويىلعان مىندەتتەر قىزمەتكەرلەردىڭ جۇمىس ىستەۋىنە قولايلى جاعداي جاساپ، قاۋىپسىزدىگىن قامتاماسىز ەتۋدى كوزدەيدى" دەلىنگەن اقپاراتتىق حابارلامادا.