ءبىلىم جانە عىلىم ءمينيسترى اسحات ايماعامبەتوۆ عالىم ايەلدەر ءۇشىن ارنايى كۆوتالار ەنگىزىلەتىنىن مالىمدەدى.
مينيسترلىكتىڭ مالىمەتىنە سۇيەنسەك، وتكەن جىلى گرانتتىق قارجىلاندىرۋدىڭ جاڭا تۇرلەرى ەنگىزىلدى. ونىڭ ىشىندە شاعىن جانە حالىقارالىق كوللابوراسيا بويىنشا گرانتتار بار.
2020 جىلى عىلىمي جوبالار بويىنشا 5 كونكۋرس وتكىزىلگەن. عىلىمدى اكىمشىلەندىرۋ جۇيەسى جەتىلدىرىلىپ، جوبالاردان كۇتىلەتىن ناتيجەلەرگە قويىلاتىن تالاپتار ارتتىرىلعان.
ءبىلىم ءمينيسترى جاس عالىمداردى قولداۋعا دا ەرەكشە كوڭىل ءبولىنىپ وتىرعانىن ايتتى.
– ءبىز عالىمداردىڭ تاعىلىمدامادان ءوتۋى ءۇشىن 500 گرانت ءبولۋ تۋرالى تاپسىرما شەڭبەرىندە جۇمىستى ۇيىمداستىرامىز. سونىمەن قاتار ق ر پرەزيدەنتى ۇلتتىق قوعامدىق سەنىم كەڭەسى وتىرىسىندا جاس عالىمدارعا كەمىندە 1000 عىلىمي گرانت ءبولۋدى تاپسىردى. قارجىلاندىرۋ بار، جۇمىس جۇرگىزىلەتىن بولادى.
جاس زەرتتەۋشىلەرگە قولداۋ كورسەتۋ ءۇشىن ءبىز عىلىمي گرانتتارعا كونكۋرستار جاريالاۋ كەزىندە ارنايى كۆوتا ەنگىزدىك. ءقازىر ءبىز جاس عالىم ايەلدەردىڭ سانىنا قاتىستى دا ءدال وسىنداي كۆوتانى ەنگىزەمىز دەپ شەشىم قابىلدادىق. بۇل تۋرالى ءبىزدىڭ عالىم ارىپتەستەرىمىزبەن كەزدەسۋلەردە بىرنەشە مارتە ايتىلعان بولاتىن، – دەدى ايماعامبەتوۆ.
پىكىر قالدىرۋ