قاڭتار-اقپان ايلارى ارالىعىندا قازاقستاندىقتارعا مۇگەدەكتىك جانە اسىراۋشىدان ايىرىلۋ بويىنشا جاردەماقى تۇرىندە 64 ملرد تەڭگەدەن استام قاراجات تولەندى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلادى.
بيىل 1 ناۋرىزداعى مالىمەت بويىنشا، مۇگەدەكتىگىنە بايلانىستى مەملەكەتتىك الەۋمەتتىك جاردەماقى الۋشىلاردىڭ سانى – 520،8 مىڭ ادام. ال اسىراۋشىسىنان ايىرىلعانداردىڭ سانى 167،2 مىڭ ادامعا جەتكەن.
ۆەدومستۆو مالىمەتىنشە، 2021 جىلى قاڭتار-اقپان ايلارى ارالىعىندا رەسپۋبليكالىق بيۋدجەتتەن مۇگەدەكتىگى بويىنشا مەملەكەتتىك الەۋمەتتىك جاردەماقى تولەۋگە 51 ملرد تەڭگە، اسىراۋشىسىنان ايرىلۋ جاعدايىنا 13،5 ملرد تەڭگە تولەنگەن.
سونداي-اق اقپاندا رەسپۋبليكالىق بيۋدجەتتەن مۇگەدەكتىگى بويىنشا مەملەكەتتىك الەۋمەتتىك جاردەماقىلاردى تولەۋگە 25،6 ملرد تەڭگە، اسىراۋشىسىنان ايىرىلعاندارعا 6،8 ملرد تەڭگە بولىنگەن.
"مۇگەدەكتىك جانە اسىراۋشىدان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبى مەن سەبەبىنە، قايتىس بولعان (قازا تاپقان) اسىراۋشىنىڭ اسىراۋىندا بولعان ادامداردىڭ سانىنا، سونداي-اق ءتيىستى قارجى جىلىنا ارنالعان "رەسپۋبليكالىق بيۋدجەت تۋرالى" زاڭدا بەلگىلەنگەن ەڭ تومەنگى كۇنكورىس دەڭگەيىنە بايلانىستى بولادى" دەلىنگەن مينيسترلىك حابارلاماسىندا.
2021 جىلعى 1 ناۋرىزداعى جاعداي بويىنشا مۇگەدەكتىگى بويىنشا مەملەكەتتىك الەۋمەتتىك جاردەماقىنىڭ ورتاشا مولشەرى 49 211 تەڭگەنى، اسىراۋشىدان ايىرىلۋ جاعدايى بويىنشا مەملەكەتتىك الەۋمەتتىك جاردەماقىنىڭ ورتاشا مولشەرى 40 976 تەڭگەنى قۇراعان.
پىكىر قالدىرۋ