بىلتىر قازاقستاندا 2019 جىلعى كورسەتكىشكە قاراعاندا 30 مىڭ ادام ارتىق قايتىس بولعان. بۇل 21،8 پايىزعا جوعارى. مۇنداي دەرەكتەردى energyprom.kz تالداۋ قىزمەتى ۇسىندى.

2020 جىلى قاڭتار-جەلتوقسان ايىندا تىنىس الۋ جولدارى ينفەكسياسىنىڭ 610،5 مىڭ جاعدايى تىركەلگەن، بۇل 2019 جىلمەن سالىستىرعاندا 13،2 پايىزعا ارتىق. ونىڭ 82،6 پايىزى نەمەسە 504 مىڭ جاعداي قالالىق جەرلەردە، 17،4 پايىزى نەمەسە 106،5 مىڭى اۋىلدىق جەرلەردە تىركەلگەن.

دەنساۋلىق ساقتاۋ مينيسترلىگىنىڭ رەسمي مالىمەتتەرى بويىنشا، 2020 جىلدىڭ 13 ناۋرىزىنان 2021 جىلدىڭ 15 ناۋرىزىنا دەيىن رەسپۋبليكادا كوروناۆيرۋستىڭ 225 685 (CVI +) جاعدايى انىقتالعان. ونىڭ ىشىندە 2865 ادام ولگەن. 2020 جىلعى 1 تامىزدان باستاپ 2021 جىلعى 15 ناۋرىزعا دەيىن كوروناۆيرۋس ينفەكسياسىنىڭ (CVI−) بەلگىلەرى بار پنيەۆمونيانىڭ 49 871 جاعدايى تىركەلىپ، 652 ادام قايتىس بولعان.

قازاقستاندا كوروناۆيرۋس ستاتيستيكاسىنا قاتىستى الدەنەشە رەت داۋ شىققان. ىندەت ورشىگىن 2020 جىلعى ماۋسىم-شىلدە ايلارىندا ءولىم-جىتىم كوبەيە ءتۇستى. الايدا قايتىس بولعاندار كوروناۆيرۋس ستاتيستيكاسىنا قوسىلعان جوق. باستاپقىدا پنيەۆمونياعا شالدىققاندار مەن پنيەۆمونيادان كوز جۇمعاندار دا كوروناۆيرۋس ستاتيستيكاسىنا قوسىلماي كەلدى. ماسەلە تۋرالى قازاقستان جانە شەتەل ءباسپاسوزى جازا باستاعان سوڭ عانا پرەزيدەنت توقايەۆ ستاتيستيكانى رەتتەۋدى تاپسىرىپ، 1 تامىزدان باستاپ كوروناۆيرۋس ستاتيستيكاسىنا پنيەۆمونيانى قوسىپ ساناي باستاعان.