الماتىنىڭ باس سانيتار دارىگەرى جانداربەك بەكشين جاڭا قاۋلىعا قول قويدى. بۇل تۋرالى قالالىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسپا ءسوز قىزمەتى حابارلادى.

قاۋلىعا سايكەس، دەمالىس كۇندەرى ساۋدا ۇيلەرى، جابىق بازارلار، اشىق بازارلار، بالالاردى تۇزەتۋ بولمەلەرى، ەرەسەكتەر جانە بالالاعا ارنالعان ءبىلىم بەرۋ ورتالىقتارى، مادەنيەت نىساندارى، تەاتر، كينوتەاتر، كونسەرتتىك نىساندار، سيركتەر، بالالاردىڭ ويىن-ساۋىق ورتالىقتارى، بانكەت زالدارىنىڭ جۇمىس ىستەۋىنە تىيىم سالىنادى.

سونداي-اق كوپشىلىك جانە بۇقارالىق ءىس-شارالاردىڭ، ياعني كونفەرەنسيالار، فورۋمدار، جيىندار، ميتينگتەر، شەرۋلەر، پيكەتتەر جانە ءبىر وتباسى مۇشەلەرىنەن ارتىق ادامداردىڭ قاتىسۋىمەن وتكىزىلەتىن تويلار، مەرەيتويلار، ۇلتتىق ىرىمدار، تۋعان كۇن مەرەكەسىنىڭ وتۋىنە دە تىيىم سالىنادى.

قوعامدىق كولىكتەردىڭ جۇمىس ىستەۋ كەستەسىنە وزگەرىس ەنگىزىلدى. جۇمىس كۇندەرى شتاتتىق رەجيمدە، دەمالىس جانە مەرەكە كۇندەرى كۇندىز ساعات 06:00-دەن 10:00-گە دەيىن، كەشكە ساعات 17:00-دەن 22:00-گە دەيىن جۇرەدى.

قۇجات 20 ناۋرىزدا كۇشىنە ەنەدى.

قۇجاتتىڭ تولىق نۇسقاسى مىنا جەردە.