پرەزيدەنت قاسىم-جومارت توقايەۆ مونيتورينگ اگەنتتىگىنىڭ ءتوراعاسى جانات ەليمانوۆتى قابىلدادى. بۇل تۋرالى اقوردا سايتى حابارلادى.
سايت مالىمەتىنشە، مونيتورينگ اگەنتتىگىنىڭ ءتوراعاسى توقايەۆقا كولەڭكەلى ەكونوميكاعا قارسى ءىس-قيمىلداردى كۇشەيتۋ جونىندە بەرگەن تاپسىرمالارىنىڭ ورىندالۋ بارىسى تۋرالى ەسەپ بەرگەن.
جانات ەليمانوۆتىڭ ايتۋىنشا، جىل باسىنان بەرى سەگىز ۇيىمداسقان قىلمىستىق توپتىڭ جولى كەسىلگەن، ونىڭ ەكەۋى ترانسۇلتتىق توپ. سونداي-اق ول بيۋدجەت قارجىسىن جىمقىرۋ دەرەكتەرى بويىنشا 14 ميلليارد تەڭگە كولەمىندە شىعىن كەلتىرگەن 125 قىلمىستىق ءىس قوزعالعانىن جەتكىزدى.
پرەزيدەنتكە اگەنتتىكتىڭ قارجى پيراميدالارىنىڭ جولىن كەسۋ باعىتىندا اتقارىپ جاتقان جۇمىستارى تۋرالى باياندالدى. ۆەدومستۆو باسشىسىنىڭ ايتۋىنشا، بۇگىنگى تاڭدا كۇماندى ىس-ارەكەتتەر بويىنشا 21 ماتەريال قۇقىق قورعاۋ ورگاندارىنا جولدانعان.
بۇدان بولەك جانات ەليمانوۆ مەملەكەت باسشىسىنا كاسىپكەرلەردىڭ قىلمىستىق قۋدالاۋعا تۇسۋىنە جول بەرمەۋ ءۇشىن قابىلدانىپ جاتقان شارالار جونىندە مالىمەت بەردى. ول 2020 جىلدىڭ قورىتىندىسى بويىنشا تىركەلگەن ەكونوميكالىق قىلمىستاردىڭ سانى وتكەن جىلدارمەن سالىستىرعاندا التى ەسەگە ازايعانىن ايتتى. قىلمىستىق ىستەردى تەكسەرۋ بويىنشا كاسىپكەرلەردى تەرگەۋگە شاقىرۋلاردىڭ سانى ەكى ەسەگە، ال تەرگەپ-تەكسەرۋ مەرزىمى 40 پايىزعا قىسقارعان.
قاسىم-جومارت توقايەۆ بيزنەسىن ادال جۇرگىزىپ وتىرعان كاسىپكەرلەردىڭ قىلمىستىق قۋدالاۋعا تۇسۋىنە جول بەرمەۋ جونىندە جۇيەلى شارالار قابىلداۋ قاجەتتىگىنە نازار اۋداردى.
كەزدەسۋ سوڭىندا پرەزيدەنت قارجىلىق مونيتورينگ اگەنتتىگىنىڭ ءتوراعاسىنا ءبىرقاتار ناقتى تاپسىرما بەردى.
پىكىر قالدىرۋ