شىڭجانداعى ادام قۇقىعى پروبلەمالارى ءۇشىن اقش، ەو، ۇلىبريتانيا، كانادا بيلىگى جۇڭگو شەنەۋنىكتەرىنە قارسى سانكسيالاردى باستادى.
دۇيسەنبىدە اقش، ەو، ۇلىبريتانيا جانە كانادا شىڭجاڭداعى ادام قۇقىعىنىڭ اۋىر دارەجەدە بۇزىلعانىن مالىمدەدى.
"حالىقارالىق ايىپتاۋلار كۇشەيگەنىنە قاراماستان جۇڭگو شىڭجاڭدا گەنوسيد پەن ادامزاتقا قارسى قىلمىستاردى جالعاستىرىپ جاتىر" دەدى وسى اپتادا بريۋسسەلدە ەۋروپالىق وداق جانە ناتو-نىڭ رەسمي تۇلعالارىمەن كەزدەسەتىن اقش مەملەكەتتىك حاتشىسى انتونيي بلينكەن.
"بۇل ءىس-شارالار ادام قۇقىقتارىن قۇرمەتتەۋدى العا جىلجىتۋ ءۇشىن ءبىزدى كوپجاقتى جۇمىس ىستەۋگە جەتەلەيدى جانە جۇڭگو ۇكىمەتى مەن جۇڭگو كوممۋنيستىك پارتياسىنداعى وسى قاتىگەزدىككە جاۋاپتى ادامدارعا قىسىم جاساۋ بويىنشا ءبىزدىڭ تۇراقتى ۇستانىمىمىزدى كورسەتەدى" دەدى ول.
ەو الدىمەن ءوز سانكسيالارىن جاريالاپ، شىڭجاڭداعى ءتورت شەنەۋنىك پەن ءبىر ۇيىمنىڭ اتىن اتادى. بۇل وداقتىڭ 1989 جىلى تيانانمەن الاڭىنداعى قاندى رەپرەسسيادان كەيىن قىتايلىق شەنەۋنىكتەرگە باعىتتالعان العاشقى سانكسياسى.
اقپاراتقا سايكەس، ەۋروپالىق وداق، ۇلىبريتانيا، كانادا جانە اقش سانكسيالارى قىتايدىڭ ميلليونداعان ۇيعىر، قازاق جانە باسقا دا ەتنيكالىق ازشىلىقتاردى قايتا تاربيەلەۋ لاگەرلەرىنە قاماعانى ءۇشىن سالىنىپ وتىر. "بۇل شىڭجاڭ ايماعىندا ادام قۇقىعىنىڭ بۇزىلۋىنا جاۋاپ" دەپ حابارلادى باتىس باق-تارى.
الايدا، بەيجىڭ بۇل لاگەرلەر كاسىپتىك وقىتۋ ورتالىعى جانە تەرروريزممەن كۇرەسۋ كۇشتەرىنىڭ بولىگى ەكەنىن ايتادى.
–شىڭجاڭداعى ادام قۇقىقتارىنىڭ جاپپاي بۇزىلۋىنىڭ دالەلدەرىن، سونىڭ ىشىندە جاپپاي قاماۋ مەن باقىلاۋ، ازاپتاۋ جانە ءماجبۇرلى ابورت تۋرالى حابارلاردى ەسكەرمەۋگە بولمايدى،– دەدى
ۇلىبريتانيانىڭ سىرتقى ىستەر ءمينيسترى دومينيك رااب. ول قىتايدىڭ شىڭجاڭداعى از ۇلتتارعا دەگەن قارىم-قاتىناسى تۋرالى "ەكىنشى دۇنيەجۇزىلىك سوعىستان كەيىنگى ەتنيكالىق جانە ءدىني توپتى جاپپاي ۇستاۋ" دەپ مالىمدەدى.
ال، اقش وكىلى "ءبىز بۇكىل الەمدەگى وداقتاستارىمىزبەن بىرگە قحر-دىڭ قىلمىستارىن تەز ارادا توقتاتۋعا جانە كوپتەگەن قۇرباندار ءۇشىن ادىلەتتىلىككە شاقىرامىز" دەدى.
پىكىر قالدىرۋ