جەر ماسەلەلەرى جونىندەگى زاڭگەر باقىتجان بازاربەك جەرگىلىكتى جەرلەردەگى اتقارۋشى ورگاندار ءتۇرعىنۇي سالۋعا ارنالعان جەر ۋچاسكەلەرىن ساتۋدى تىيۋ ءۇشىن جەر كودەكسىنىڭ 97-بابى 3-تارماعىنا وزگەرىس ەنگىزۋ كەرەكتىگىن ۇسىندى.
ونىڭ ايتۋىنشا، جەر كودەكسىنىڭ 97-بابى 3-تارماعىنا سايكەس، شارۋا-فەرما قوجالىعى جەرلەرىنىڭ نىسانالى ماقساتىن جەكە ءتۇرعىنۇي قۇرىلىسى مەن جەكە قوسالقى ءۇي شارۋاشىلىعى ءۇشىن اۋىستىرۋعا تىيىم سالىنعان. بۇل نورما جۇمىس ىستەگەنىمەن، 97-باپتىڭ 3-تارماعىن اينالىپ ءوتۋدىڭ امالى تابىلعان.
– جەرگىلىكتى اتقارۋ ورگاندارى مەن اكىمدىكتەر نىسانالى ماقساتى بويىنشا شارۋا-فەرما قوجالىعى جەرلەرىن ساياجاي قۇرىلىسى مەن باعباندىققا اينالدىرۋ ارقىلى نىسانالى ماقساتتى اۋىستىرىپ جاتىر. بۇعان جەر كودەكسىندە تىيىم سالىنباعان. زاڭداعى وسى ولقى تۇستى پايدالانىپ، جەرگىلىكتى اتقارۋ ورگاندارى الماتى، نۇر-سۇلتان، شىمكەنت قالالارىنىڭ ماڭىنداعى مىڭداعان اۋىل شارۋاشىلىق القاپتارىن ءتۇرعىنۇي سالۋعا، ياعني ساياجاي قۇرىلىسىنا، باعباندىققا اۋىستىرىپ جاتىر، – دەدى ول جەر رەفورماسى جونىندەگى كوميسسيا وتىرىسىندا.
زاڭگەر وسى فاكتورلاردى نەگىزگە الىپ، جەر رەفورماسى جونىندەگى كوميسسيا ارقىلى جەر كودەكسىنىڭ 97-بابى 3-تارماعىنا وزگەرىس ەنگىزىپ، شارۋاقوجالىعى جەرلەرىنىڭ نىسانالى ماقساتىن اۋىستىرۋدى توقتاتۋدى ۇسىندى.
پىكىر قالدىرۋ