ءبىلىم جانە عىلىم ۆيسە-مينيسترى شولپان كارينوۆا بيىل ءبىرىنشى سىنىپقا قابىلداۋ ەلەكتروندىق فورماتتا جۇرگىزىلەتىنىن مالىمدەدى. بۇل تۋرالى ول ورتالىق كوممۋنيكاسيالار قىزمەتىندە وتكەن بريفينگتە ايتتى.
– اتا-انالاردىڭ ءوتىنىشى بويىنشا 1-سىنىپقا التى جاسار جانە بيىل 6-عا تولاتىن بالالار قابىلدانادى. 2021-2022 وقۋ جىلى 1-سىنىپقا 340 مىڭنان اسا بالا قابىلداۋ جوسپارلانىپ وتىر. ءبىرىنشى سىنىپ وقۋشىلارىنىڭ قۇجاتتارىن قابىلداۋ 1 ساۋىردە باستالىپ، 1 تامىزعا دەيىن جالعاسادى. قۇجاتتاردى egov.kz ارقىلى بەرۋگە بولادى، – دەدى ۆيسە-مينيستر.
قۇجاتتاردى تاپسىرۋ كەزىندە بالانىڭ تۋۋ تۋرالى كۋالىگىنىڭ كوشىرمەسى، بالا دەنساۋلىعى پاسپورتى، 3ح4 كولەمىندەگى 2 فوتو بولۋى كەرەك.
سونداي-اق ول مەكتەپ تۇلەكتەرىنىڭ قورىتىندى اتتەستاسياسى قالاي وتەتىنىن ءتۇسىندىردى.
9-سىنىپ وقۋشىلارى 3 ەمتيحان تاپسىراتىن بولادى:
- وقىتۋ ءتىلى بويىنشا ەسسە نىسانىندا جازباشا ەمتيحان؛
- ماتەماتيكادان (الگەبرادان) جازباشا ەمتيحان؛
- وزگە تىلدەردە وقيتىن سىنىپتاردا قازاق ءتىلى مەن ادەبيەتى بويىنشا جازباشا ەمتيحان جانە قازاق تىلىندە وقىتاتىن سىنىپتارداعى ورىس ءتىلى مەن ادەبيەتى بويىنشا جازباشا ەمتيحان.
11-سىنىپ وقۋشىلارى 4 ەمتيحان تاپسىرادى:
- وقىتۋ ءتىلى بويىنشا ەسسە نىسانىندا جازباشا ەمتيحان؛
- الگەبرا جانە اناليز باستامالارى پانىنەن جازباشا ەمتيحان؛
- قازاقستان تاريحىنان تەستىلەۋ؛
- وزگە تىلدەردە وقىتاتىن مەكتەپتەردە قازاق تىلىنەن جانە قازاق تىلىندە وقىتاتىن مەكتەپتەردە ورىس تىلىنەن تەستىلەۋ.
پىكىر قالدىرۋ