سەمەي قالالىق ءماسليحاتى جاڭا شاقىرىلىمىنىڭ دەپۋتاتتارى پرەزيدەنت قاسىم-جومارت توقايەۆتىڭ اتىنا قوعامدىق كولىك سالاسىندا قالىپتاسقان جاعدايعا بايلانىستى حات جازدى. بۇل تۋرالى Politic سايتى حابارلادى.

"سەمەي قالاسىنىڭ تۇرعىندارى جىل بويى قوزعالىس كەستەسىنىڭ بۇزىلۋىنا بايلانىستى تاسىمالداۋشىلاردىڭ جۇمىس ساپاسىنا نارازى. جۇرگىزۋشىلەر بىرنەشە رەت جالاقىلارىن ۋاقىتىلى تولەۋدى تالاپ ەتىپ، جولعا شىعۋدان باس تارتقان بولاتىن. بۇل – كولىك قوزعالىسىن توقتاتىپ، قالادا الەۋمەتتىك شيەلەنىس تۋدىردى" دەلىنگەن دەپۋتاتتار حاتىندا.

ءماسليحات دەپۋتاتتارىنىڭ ايتۋىنشا، 2017 جىلى جەكەمەنشىك پارك يەلەرى جولاۋشىلار كولىگى قوزعالىسىن توقتاتقاننان كەيىن وبلىس باسشىلىعى جەكە ينۆەستيسيالاردى تارتا وتىرىپ، مەملەكەتتىك-جەكەمەنشىكسەرىكتەستىك نەگىزىندە Semey Bus مۋنيسيپالدىق اۆتوبۋس پاركىن قۇرۋ تۋرالى شەشىم قابىلداعان. جاڭا كاسىپورىن قدب بانكىن قارجىلاندىرۋ كەزىندە وتاندىق ءوندىرىستىڭ 170 اۆتوبۋسىن كرەديتتىك نەگىزدە ساتىپ العان. وسىلايشا، سەمەي جىلجىمالى قۇرامدى 100 پايىز جاڭارتىپ، "سيفرلى قازاقستان" باعدارلاماسى بويىنشا ەلەكتروندىق بيلەتتەۋدى ەنگىزگەن العاشقى ءوڭىر بولدى. بۇل ەكى شارت ءتيىمسىز مارشرۋتتاردى سۋبسيديالاۋعا ودان ءارى نەگىز بولدى. وسى رەتتە ەلەكتروندىق بيلەتتەۋدى ەنگىزۋ بيۋدجەتكە سالىق ءتۇسىمىن ون ەسەگە، ياعني 50 ملن تەڭگەدەن 500 ملن تەڭگەگە دەيىن ۇلعايتقان.

"باستاپقىدا جوبانى قولداۋ تۋرالى 2018 جىلعى 24 جەلتوقسانداعى كەلىسىممەن شىعىس قازاقستان وبلىسىنىڭ اكىمدىگى، قازاقستاننىڭ قايتا قۇرۋ بانكى جانە اۆتوپارك اراسىندا الەۋمەتتىك ماڭىزى بار، ياعني ءتيىمسىز مارشرۋتتار بويىنشا تاسىمالداردى سۋبسيديالاۋ قاراستىرىلعان بولاتىن. وبلىستىق ءماسليحاتتىڭ 2020 جىلدىڭ 9 قازانىنداعى قاۋلىسىمەن سەمەي قالاسىنداعى 38 مارشرۋتتىڭ 38ء-ى دە الەۋمەتتىك ماڭىزدى، ياعني زالالدى مارشرۋتتار دەپ تانىلدى. مۇنىڭ ءوزى ولاردى سۋبسيديالاۋعا نەگىز بولا الادى.

بۇگىندە Semey Bus ج ش س قارىزىنا بايلانىستى قيىن جاعدايعا ۇشىراپ تۇر. وسىعان بايلانىستى پارك ءوز جۇمىسىن توقتاتۋ ءقاۋپى بار. سونىڭ كەسىرىنەن قالا تىرشىلىگى توقتاپ، قوعامدىق رەزونانس تۋۋى مۇمكىن. ويتكەنى قالانىڭ بارلىق مارشرۋت جەلىسىنىڭ شامامەن 70 پايىزىن وسى پارك ارقىلى جۇزەگە اسىرىلاتىن تاسىمالدار كولەمى قۇرايدى.

بيىل بۇل ماسەلە سەمەي قالاسى جانە وبلىس اكىمدىگىندە، سونداي-اق قالالىق ءماسليحاتتىڭ Nur Otan پارتياسى دەپۋتاتتىق فراكسياسىندا بىرنەشە رەت تالقىلاۋعا شىعارىلدى. الايدا ناقتى شارالار قابىلدانبادى" دەلىنگەن حاتتا.

سونىمەن قاتار ۇندەۋدە ءمجا باعدارلاماسى بويىنشا جاڭا اۆتوبۋس پاركىن قۇرۋ ماسەلەسىنە قاتىستى ءبىرقاتار سۇراقتار تۋىنداعانى ايتىلعان. ال Semey Bus اۆتوبۋس پاركىن قۇرۋعا وبلىستىق بيۋدجەتتەن 620 250 000 تەڭگە جانە 658 837 000 تەڭگە جەكە ينۆەستيسيا سالىنعان بولاتىن.  

دەپۋتاتتار قاسىم-جومارت توقايەۆتان شىعىس قازاقستان وبلىسى اكىمدىگىنىڭ جوبانى قولداۋ تۋرالى كەلىسىمدە كوزدەلگەن سۋبسيديالاردى ءبولۋ جونىندەگى ءوز مىندەتتەمەلەرىن ورىنداۋىنا ىقپال ەتۋدى سۇرايدى.