بۇگىنگى كۇنى ءبارىمىز بىلەتىن KFC ءدامحانالارى نەگىزىن قالاۋشى حارلاند ساندەرس ومىرىمدە 1009 رەت جەڭىلىسكە ۇشىراعان جانە 65 جاسىندا عانا تابىسقا جەتتى.

ساندەرس 5 جاسىندا اكەسى قايتىس بولدى دا، ونىڭ اناسى وتباسىنىڭ كۇن كورىسى ءۇشىن كۇنى بويى جۇمىس ىستەۋگە ءماجبۇر بولدى. بالا ساندەرس تە باۋىرلارىن اسىراۋعا كومەكتەسۋدى ويلاپ، جاستاي جۇمىس ىستەدى. ول 6 جاسىندا تاماق ءپىسىرۋدى ۇيرەندى. 7 جاسىندا-اق مىقتى اسپازعا اينالدى. 10 جاسىندا فەرمادا جۇمىس ىستەدى. ەكى جىلدان كەيىن شەشەسى ەكىنشى رەت تۇرمىس قۇردى. ءبىراق ەكىنشى كۇيەۋى بالالاردى ۇرىپ-سوعاتىن ادام بولدى دا، ساندەرس مەكتەپتەگى وقۋىنان شىعۋعا ءماجبۇر بولدى.

13 جاسىندا ۇيىنەن كەتىپ، اتا اربالاردى بويايتىن جۇمىسقا كىردى. 15 جاسىندا اقش ارمياسىنا كەتتى. 18 جاسىندا ۇيلەنىپ، وتباسىن قۇردى. ءبىر ۇلى، ەكى قىزى بولدى. وكىنىشكە قاراي، ۇلى جاستاي قايتىس بولدى. ءبىر كۇنى ساندەرس ۇيىنە كەلگەندە ايەلىنىڭ كەتىپ قالعانىن ءبىلدى. ايەلىنىڭ اعاسى وعان قالدىرعان حاتتا "سەن سياقتى جۇمىسسىز ادامعا وتباسى كەرەك ەمەس" دەپ جازعان-دى. وسىلايشا ونىڭ وتباسى ەكىگە ءبولىندى

ساندەرس ءومىرىنىڭ الدىڭعى جارتىسىندا ءار ءتۇرلى جۇمىستار ىستەدى. ول ساقتاندىرۋ قىزمەتتەرىن ساتتى، دوڭگەلەك ساتتى، فەرمادا جۇمىس ىستەدى، قايىقتا جۇرگىزۋشى بولدى، حاتشى دا بولدى، زاڭگەر بولدى، ىستەمەگەن جۇمىسى قالمادى. وسىلايشا، ساندەرس ءبىر جۇمىستا تۇراقتاپ ۇزاق ۋاقىت ىستەي المادى. ول ۇنەمى جۇمىستان شىعارىلىپ وتىردى.

ول 40 جاسقا كەلگەندە جانار ماي بەكەتىندە قۋىرىلعان تاۋىق ەتىن ساتتى. كوپ وتپەي، ونىڭ قۋىرعان تاۋىعى بارعان سايىن تانىمال بولىپ، 140 ورنى بار ۇلكەن ءدامحاناعا اينالدى. كەيىنگى ون جىلدا ساندەرس تاۋىق قۋىرۋعا ارنالعان "قۇپيا رەسەبىن" دامىتتى.

ءبىراق ول 65 جاسقا كەلگەندە ونىڭ اسحانا بيزنەسى بانكروت بولدى. ناتيجەسىندە 65 جاستاعى ساندەرس زەينەتكە شىققان جانە بانكروت بولعان ادامعا اينالدى.

الايدا ول ءوزىنىڭ ارمانىنىڭ ورىندالاتىنىنا سەنۋدەن تايمادى. ساندەرس ەشقاشان كۇدەر ۇزبەدى. ول ءوزىنىڭ قوعامدىق ساقتاندىرۋ قورىنداعى 105 دوللاردى قولدانىپ، امەريكانى ارالاپ، بيزنەس سەرىكتەستەر ىزدەدى. ول ساندەرستىڭ ومىرىندەگى ەڭ قيىن ۋاقىتتار ەدى. ساندەرس سول كەزدەگى ەكى جىلدا كولىگىندە ۇيىقتادى جانە اش ءجۇردى. ونىڭ ۇستىنە ساندەرستىڭ ۇسىنىسى ارت-ارتىنان تويتارىلىپ وتىردى. ءبىراق ول ءۇمىت ءۇزۋدى ەشقاشان تاڭدامادى. ساندەرستىڭ ۇسىنىسى 1009 رەت كەرى قايتارىلدى. ەڭ سوڭىندا وعان كەلىسەتىندەر شىقتى.

كەيىنىرەك ساندەرستىڭ 600 فرانشيزاسى بار KFC ءدامحاناسى بولدى. ونىڭ ءدامحاناسى تەز دامىعانى سونشالىق، ساندەرستىڭ باسقارۋى قيىنعا سوقتى. 1964 جىلى ول ءدامحانانى 2 ملن دوللارعا ساتتى. دەگەنمەن ول كومپانيانىڭ وكىلى رەتىندە ورنىن ساقتاپ قالدى.

ساندەرس 90 جاسىندا ومىردەن وزدى.
بۇگىنگى كۇنى الەمدە 20 مىڭنان ارتىق KFC ءدامحانالارى بار جانە جىلدىق تابىسى 27 ميلليارد دوللار.