ءبىر وبلىستىڭ نەمەسە قالانىڭ اكىمى جەمقورلىقپەن ۇستالىپتى دەگەن جاڭالىققا سەلت ەتپەيتىن بولعانبىز. ءبىزدىڭ تاڭقالىستان تىتىركەنەتىن تالشىقتارىمىز بۇنداي اقپاراتتى قالىپتى دەپ قابىلدايدى. اكىم با؟ ول مىندەتتى تۇردە جەۋ كەرەك، پاراقور بولۋعا ءتيىستى. ۇلتتىڭ نەسىبەسىنىڭ تالان-تارجعا ءتۇسىپ، كىم كورىنگەننىڭ قالتاسىنا سۇڭگىپ كەتۋىنە ءبىز ءمىز باقپايمىز. «جاقسى مەنەن جاماندى» پارىقتاي المايتىنداي بىزگە نە كورىندى؟ پارقىسىزدىق تالعامدى تومەندەتەدى. ال تالعامنىڭ جوقتىعى كوپتەگەن مۇمكىندىكتەردى شەكتەي باستايدى. مۇمكىندىگى شەكتەۋلى ۇلت! جاقسى ەستىلە قويمايتىن ءسوز. ءبىراق شىندىعى ءسول-بىزدىڭ مۇمكىندىگىمىز كۇننەن كۇنگە شەكتەلىپ كەلە جاتىر. ەلىمىزدەگى «اكىمكەتىستىڭ» سوڭعى سەنارييىنە كوز جۇگىرتىپ كورىڭىز. قازاقستاندا قوستاناي دەگەن قالا بار ەمەس پە ەدى؟! ول قالانى احمەتبەك احمەتجانوۆ دەگەن ازامات باسقارىپ وتىرادى. كۇندەر وتە بەرەدى. 2015 جىلدىڭ 1-تامىزىندا اكىمنىڭ ورىنباسارى ماقسۇت قالييەۆ قالاداعى "پرەميۋم پالاس"مەيرامحاناسىندا پارا الدى دەگەن كۇدىكپەن ۇستالادى. ول جالعىز ەمەس ەكەن. ەكى كۇننەن سوڭ، ا. احمەتجانوۆتىڭ ەكىنشى ورىنباسارىنىڭ دا قولىنا كىسەن سالىندى. فرۋنزيك اراكەلياننىڭ دا كۇدىككە ءىلىنىپ (اكىمنىڭ ەكىنشى ورىنباسارى)، قىزمەت بولمەسىندە ۇستالعاندىعى تۋرالى اقپار تاراي باستايدى. بۇل وقيعانىڭ وتكەنىنە ءبىر اي تولا بەرگەندە اكىمنىڭ ءوزى اكىمتاقتان باس تارتۋدى قۇپ كورەدى. وبلىس اكىمى نۇرالى ءسادۋاقاسوۆ ا. احمەتجانوۆتىڭ جىلى ورنىنان جىلىستاعانىنا قارسى بولا قويمايدى. ءبىراق قىزمەتىنەن بوساعانىنا ءبىر كۇن بولماي جاتىپ قالانىڭ بۇرىنعى اكىمى احمەتبەك احمەتجانوۆ 8 قىركۇيەك كۇنى ساعات 17.05-تە قىزمەتىن اسىرا پايدالاندى دەگەن كۇدىكپەن ۇستالدى. ءقازىر ول ءۇي قاماقتا وتىر. ال بۇرىنعى اكىمنىڭ اكىمدىك ورىنتاقتى بوساتۋىنا بايلانىستى بۇيرىققا قول قويعان نۇرالى ءسادۋاقاسوۆتىڭ تاعدىرى باسقاشا ءوربىدى. ابىروي بولعاندا دەيمىز بە، ا. احمەتجانوۆ پەن ونىڭ ەكى ورىنباسارىنا تەلىنگەن كۇدىك پەن ايىپتىڭ وعان قاتىسى جوق. دەسە دە قالا باسشىسىنىڭ قىزمەتىن اسىرا پايدالانىپ، ەكى ورىنباساردىڭ پارامەن ۇستالعانى ن. ءسادۋاقاسوۆتىڭ قىزمەتىنە كولەڭكە تۇسىرمەدى دەۋگە كەلمەيدى. ءبىراق زەرەندى اۋدانىندا قۇرامىندا 15 ادامى بار تەاتر اكتەرلەرىنىڭ توبى اقمولا، قوستاناي جانە سولتۇستىك قازاقستان وبلىستارىنىڭ اكىمدەرىنىڭ الدىندا قويىلىم قويىپتى دەپ تاراعان اقپارات پاراقور ورىنباسارلاردىڭ اركەتىنەن الدەقايدا اۋىر ءتيدى. بۇعان قاتىستى اكىمدىككە قارايتىن باسپا ءسوز قىزمەتتەرى قانشا تۇسىنىك بەرسە دە، اقپارات تاراتۋشى تاراپ، ناقتىراق ايتساق داۋلەت قۋانىشبايەۆ وزىنە قىسىم جاسالىپ جاتقاندىعىن، وسىعان قاتىستى اشتىق جاريالايتىنىن Facebook پاراقشاسىندا جازدى. وسىلايشا، نۇرالى ءسادۋاقاسوۆتىڭ ءوزى دە اكىمدىك ورىنتاعىن بوساتتى. ونىڭ ورنىنا ارحيمەد مۇحامبەتوۆ بارىپ جايعاستى. ارحيمەد بەگەجان ۇلى مۇحامبەتوۆ 1972 جىلدىڭ 6 ماۋسىمدا اقتوبە وبلىسى العا اۋدانىندا دۇنيەگە كەلگەن. سامارا مەملەكەتتىك تەحنيكالىق ۋنيۆەرسيتەتى مەن قازاق-ورىس حالىقارالىق ۋنيۆەرسيتەتىن ءتامامداعان. ماماندىعى بويىنشا - ينجەنەر-ەلەكتريك، سونىمەن قاتار، قارجى باكالاۆرى.
ول ەڭبەك جولىن اقتوبە قالاسىنىڭ كوممەرسيالىق قۇرىلىمدارىندا باستاعان. اقتوبە وبلىسىنىڭ سىرتقى-ەكونوميكالىق بايلانىس جانە ينۆەستيسيالار باسقارماسىنىڭ باستىعى، «شاعىن كاسىپكەرلىكتى دامىتۋ قورى» اق وڭىرلىك ديرەكتورى، اقتوبە قالاسى اكىمىنىڭ ورىنباسارى، اقتوبە قالاسىنىڭ اكىمى قىزمەتتەرىن اتقاردى. 2011 جىلعى 22 شىلدەسىنەن باستاپ اقتوبە وبلىسىنىڭ اكىمى قىزمەتىندە بولدى. ال، اقتوبە وبلىسىنا بەردىبەك ساپاربايەۆ اكىم بولىپ باردى. باس قالاداعى پرەمەر- مينيستر ماڭىنان ب.ساپاربايەۆتى نە ءۇشىن الشاقتاتۋ كەرەك بولدى؟
ءبارىن اي تا، ءبىرىن ايت، قوستاناي وبلىسىنىڭ بۇرىنعى اكىمىنە «ساۋناداعى سەرىلىك» دەپ اتالاتىن كۇيە جاعىلىپ ەدى عوي. سوعان قايتا ورالايىقشى. بۇرىنعى اكىم وسى كۇيەدەن بەتىن قايتا تازارتا الا ما؟ قوستاناي قالاسىنىڭ اكىمى مەن قوس ورىنباسارىنىڭ ارەكەتىنە ونىڭ قاتىسى بار ما؟ الدە ول شىنىندا قوستانايدا بولىپ جاتقان جايدان بەيحابار، زەرەندىدە ساۋنادا ساۋىق تاماشالاپ ءجۇردى مە؟ بالكىم ونى قىزمەتتەن بوساتۋ ماقساتىندا وسىنداي قوس بۇيىردەن ءبىر-اق سوعاتىن ساياسي سەنريي دايىندالعان بولار. ولاي بولۋى دا عاجاپ ەمەس. ويتكەنى بىلتىر ونىڭ ويىنشىق ءمۇسىنىن جاساپ كورمەگە قويعان بولاتىن. سول قالپى اكىمنىڭ سۋۆەنير ءمۇسىنىن كورمەگە كىم قويعانى انىقتالماي كەتتى. ال اكىم ءوزى بەينەلەنگەن 20 سانتيمەترلىك ويىنشىق سۋۆەنيردى ساتىپ العان بولاتىن. وسىلايشا قوس ورىنباساردىڭ پاراقورلىعىنان باستالعان قوستاناي جىرى قوس اكىممەن قوشتاسۋعا الىپ كەلدى. ەگەر زەرەندىدەگى «ساۋناداعى ساۋىق» تۋرالى اڭگىمە وسىمەن ساپ تيىلا قالسا، وندا قارسى توپتىڭ مۇددەسى ورىندالدى دەپ تۇسىنۋگە بولاتىن شىعار. ال اڭگىمەنىڭ جالعاسى بار بولسا، وندا گاپ شىنىمەن كەتكەن اكىمنەن شىققان دەپ تۇسىنەرمىز. كىم بىلەدى؟ تۇلكى-ساياساتتىڭ قۇيرىعىنىڭ بۇلاڭىن باعىپ كورەلىك...
اينۇر تولەۋ
