بيىل اۋىل شارۋاشىلىعى مينيسترلىگى مەن ءوڭىر اكىمدەرىنىڭ الدىندا بارلىق كوكتەمگى ەگىس جۇمىستارىن ساپالى جۇرگىزۋ بويىنشا ناقتى مىندەت تۇر. بۇل تۋرالى ۇكىمەت وتىرىسىندا پرەمەر-مينيستر اسقار مامين ايتتى.
– كوكتەمگى ەگىس جۇمىستارىن ساپالى ءارى ۋاقتىلى جۇرگىزۋ ەلدىڭ ازىق-تۇلىك قاۋىپسىزدىگىن قامتاماسىز ەتۋدىڭ ماڭىزدى فاكتورلارىنىڭ ءبىرى. بىلتىر پاندەمياعا قاراماستان ەگىس جۇمىستارى وتە جوعارى دەڭگەيدە جۇرگىزىلدى. اگروتەحنولوگيالار ءدال ساقتالىپ، تىڭايتقىشتار مەن وسىمدىكتەردى قورعاۋ قۇرالدارى ۋاقتىلى سالىندى. بۇل مول استىق جيناۋعا مۇمكىندىك بەردى، – دەدى ۇكىمەت باسشىسى.
ءماميننىڭ ايتۋىنشا، الەۋمەتتىك ماڭىزى بار ازىق-تۇلىك تاۋارلارىن ساتىپ الۋعا ەرەكشە نازار اۋدارۋ كەرەك.
– بيىل ۇكىمەت كوكتەمگى ەگىستى قارجىلاي جانە ماتەريالدىق-تەحنيكالىق قامتاماسىز ەتۋ بويىنشا بارلىق قاجەت شەشىمدەردى قابىلدادى. بيۋدجەتتىك كرەديت بەرۋمەن قاتار بيىلعى جىلى اۋىل شارۋاشىلىعى ونىمدەرىن فورۆاردتىق ساتىپ الۋدى جۇزەگە اسىرۋ ءۇشىن بولىنگەن قاراجاتتىڭ كولەمى 24،5 ملرد تەڭگەدەن 45،3 ملرد تەڭگەگە دەيىن ارتتى.
سوندىقتان وسى مەحانيزمدى پايدالانا وتىرىپ، الەۋمەتتىك ماڭىزى بار ازىق-تۇلىك تاۋارلارىن ساتىپ الۋعا ەرەكشە نازار اۋدارۋ كەرەك. جالپى اۋىل شارۋاشىلىعى مينيسترلىگى مەن وڭىرلەر اكىمدەرىنىڭ الدىندا بارلىق كوكتەمگى ەگىس جۇمىستارىن ساپالى جۇرگىزۋ بويىنشا ناقتى مىندەت تۇر. وسى ماسەلەنى ەرەكشە باقىلاۋدا ۇستاۋدى تاپسىرامىن. ەكولوگيا مينيسترلىگى اۋىل شارۋاشىلىعى مينيسترلىگىمەن جانە اكىمدىكتەرمەن بىرلەسىپ، رەسپۋبليكانىڭ وڭتۇستىك وڭىرلەرىندە، ونىڭ ىشىندە ۇزاق مەرزىمدى پەرسپەكتيۆادا سۋارمالى سۋمەن تۇراقتى قامتاماسىز ەتۋ بويىنشا شارالار قابىلدانسىن، – دەدى اسقار مامين.
پرەمەر-مينيستر وڭىرلەردىڭ اكىمدەرىنە اۋىل شارۋاشىلىعى ءونىمىن وندىرۋشىلەر ءۇشىن تىزبەلەر مەن سۋبسيديالار نورمالارىن بەكىتۋ جۇمىسىن ءبىر اپتا ىشىندە اياقتاۋ، ەنەرگەتيكا مينيسترلىگىنە بەكىتىلگەن كەستە مەن باعالار بويىنشا ەگىس جۇمىستارىن جۇرگىزۋ ءۇشىن ديزەل وتىنىنىڭ قاجەتتى كولەمىن جەتكىزۋدى قامتاماسىز ەتۋ تاپسىردى.
پىكىر قالدىرۋ