ۇلىبريتانيا پرەمەر-مينيسترى بوريس دجونسون بولاشاقتاعى ىقتيمالدى پاندەميا جاعدايىنا الەم ەلدەرىنىڭ دايىندىعىن كۇشەيتۋ ءۇشىن جاڭا جاھاندىق رەتتەۋ تۋرالى 20-دان استام الەمدىك كوشباسشىعا ۇسىنىس تاستادى.

فرانسيا پرەزيدەنتى ماكرون مەن گەرمانيا كانسلەرى انگەلا مەركەل باستاعان كوشباسشىلار الەمدەگى ءىرى باسىلىمدارعا ارنالعان ماقالاسىندا كوۆيد ادامزاتقا ەكىنشى دۇنيەجۇزىلىك سوعىستان كەيىنگى ەڭ ۇلكەن سىناق بولدى دەپ مالىمدەدى.

ولاردىڭ مالىمدەمەسىندە تاعى ءبىر پاندەميا نەمەسە دەنساۋلىق داعدارىسى بولىپ جاتسا، ونى قالاي ەڭسەرۋ كەرەكتىگى تۋرالى ايتىلدى.

پاندەميا كەزىندە "ءبارى ءقاۋىپسىز بولمايىنشا، ەشكىم ءقاۋىپسىز بولمايتىنى" ەسكەرتىلدى.

Daily Telegraph گازەتىنە جانە فرانسياداعى لە موندە، يسپانيادا ەل پايس سياقتى باسىلىمدارعا سۇحبات بەرگەن 24 ليدەر شەكارالاس ىنتىماقتاستىقتى قۇرۋ ءۇشىن ەكىنشى دۇنيەجۇزىلىك سوعىس قارساڭىندا جاسالعان شارتقا ۇقساس كەلىسىمشارت قاجەت دەپ سانايدى.

– ەكىنشى دۇنيەجۇزىلىك سوعىستاعى كۇيرەۋدەن كەيىن ساياسي كوشباسشىلار كوپجاقتى جۇيەنى قۇرۋ ءۇشىن باس قوستى. ماقساتتارى ايقىن بولدى: ەلدەردى جاقىنداستىرۋ، وقشاۋلانۋ مەن ۇلتشىلدىقتىڭ ازعىرۋلارىن جويۋ.  ىنتىماقتاستىق پەن كەلىسىم رۋحىندا عانا قول جەتكىزۋگە بولاتىن قيىندىقتاردى، اتاپ ايتقاندا بەيبىتشىلىك، وركەندەۋ، دەنساۋلىق پەن قاۋىپسىزدىكتى دامىتۋ قاجەت، – دەدى دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادحانوم گەبرەسيەس.

كوشباسشىلاردىڭ پىكىرىنشە، ەلدەر ەندى پاندەميالاردى الدىن الا بولجاۋعا، الدىن الۋعا، انىقتاۋعا، باعالاۋعا جانە ولارعا جوعارى دارەجەدە ۇيلەستىرىلگەن تۇردە ءتيىمدى جاۋاپ بەرۋگە جاقسى دايىن بولۋى كەرەك.

"جاڭا كەلىسىم ادامداردى پاندەميا تۋرالى ەسكەرتۋدىڭ جاقسى جۇيەسىن قۇرۋعا كومەكتەسەدى" دەگەن ولار ۆاكسينالار مەن جەكە قورعانىس قۇرالدارىن ءبولۋدى جانە تاراتۋدى جاقسارتۋ كەرەكتىگىن كوتەردى.

دەنساۋلىق ساقتاۋ سالاسىندا باسقا پاندەميالار مەن باسقا دا توتەنشە جاعدايلار بولسا، بىردە-بىر ۇكىمەت نەمەسە كوپجاقتى اگەنتتىك بۇل قاتەردى جالعىز ءوزى شەشە المايتىنى دا ايتىلدى.