"قازاقستان تەمىر جولى" ۇلتتىق كومپانياسى باسقارما باسشىسى ساۋات مىڭبايەۆ دەنساۋلىق جاعدايىنا بايلانىستى قىزمەتىنەن كەتەتىنى تۋرالى اقپارات تارادى.
بۇل تۋرالى الدىمەن YEDILOV ONLINE تەلەگرام-كانالى حابارلادى.
"بۇعان دەيىن الەۋمەتتىك جەلىدە ونىڭ (ساۋات مىڭبايەۆتىڭ - رەد.) ومىرتقاسىن زاقىمداپ العانى، شۇعىل تۇردە گەرمانيانىڭ "شاريتە" اۋرۋحاناسىندا جەتكىزىلگەنى تۋرالى اقپارات تاراعان" دەپ جازدى تەلەگرام-كانال.
ارتىنشا Nege.kz سايتى دا بۇل تۋرالى جازىپ، ءوزىنىڭ سەنىمدى دەرەككوزى اقپاراتتى راستاعانىن حابارلادى. پورتالدىڭ دەرەككوزى "ونىڭ ومىرتقادان العان جاراقاتى تىم اۋىر. ءالى قوزعالا المايدى. جاعدايى مۇشكىل. سول سەبەپتى قىزمەتتەن كەتۋگە ارىز جازۋعا ءماجبۇر بولدى" دەپ مالىمدەگەن.
ساۋات مىڭبايەۆتىڭ "قازاقستان تەمىر جولى" ۇلتتىق كومپانياسىنىڭ باسشىسى قىزمەتىنەن كەتەتىنى رەسمي تۇردە راستالعان جوق.
الايدا YEDILOV ONLINE تەلەگرام-كانالى ونىڭ ورنىنا بارۋى ىقتيمال كانديتاتتاردىڭ ەسىمى جاريالانىپ جاتىر. تەلەگرام-كانال دەرەگىنشە، ۇلتتىق كومپانيا باسشىلىعىنا پرەزيدەنت كومەكشىسى قانات بوزىمبايەۆ نەمەسە "قازاتومپروم" كومپانياسىنىڭ باسقارما باسشىسى عالىمجان ءپىرمانوۆ تاعايىندالۋى مۇمكىن.
پىكىر قالدىرۋ