كارانتين شارالارىنىڭ تيىمدىلىگى ساراپتامادان ءوتىپ، قاۋلى قابىلداردا كاسىپكەرلەردىڭ پىكىرىنە قۇلاق تۇرىلەدى. بۇل تۋرالى الماتىنىڭ باس سانيتار دارىگەرى جانداربەك بەكشين ونلاين باسپا ءسوز قىزمەتىندە ءمالىم ەتتى.

– ەشتەڭەگە قاراماستان ءبىز قاۋلىعا وزگەرىس ەنگىزۋگە ءازىرمىز. جۇما كۇنى ەنگىزىلگەن كارانتين شارالارىنا باعا بەرىلەدى. ەگەر قاندايدا ءبىر شارالار ناتيجە بەرمەسە، ونى الىپ تاستاپ، كارانتيندى جەڭىلدەتەمىز. نىساندارعا عانا ەمەس، قولعا الىنعان شارالاردى دا ۇدايى باعالاۋ ءجۇرىپ وتىرادى، – دەدى ول.

ونىڭ سوزىنشە، بازارلار مەن ساۋدا ويىن-ساۋىق ورتالىقتارى ۆاكسينا سالاتىن ورىن بولۋگە نيەت بىلدىرگەن. "اشىق" قوسىمشاسىنا كىرىپ ۇلگەرگەندەر جۇيە بويىنشا جۇمىس ىستەي الادى.

سونداي-اق ول رەستوراندارمەن بىرلەسىپ جازعى الاڭى بار ورىنداردىڭ جۇمىس ىستەۋ ماسەلەسى شەشىلگەنىن اتاپ ءوتتى. وعان سايكەس، قوعامدىق تاماقتانۋ ورىندارى جازعى الاڭدا قوناق قابىلداۋىنا رۇحسات. تەك ورىنداردىڭ جارتىسى عانا تولۋعا ءتيىس ءارى ءار ۇستەلدىڭ اراقاشىقتىعى 2 مەتر بولۋى كەرەك.

ارتىنشا، جانداربەك بەكشيننىڭ جاڭا قاۋلىسى جاريالاندى. ول بويىنشا كافە-راستوراندار جازعى الاڭدا كۇندىزگى 07.00-22.00 ارالىعىندا قوناق قابىلداي الادى.

ستۋدەنتتەر قاشىقتان وقيدى. اتا-انالاردىڭ ءوتىنىشى بويىنشا 1-5-سىنىپ، 9،11-سىنىپ وقۋشىلارى بالا سانىن 15-تەن اسىرماي كەزەكشى سىنىپتا وقۋعا، وقۋشى سانى 300-دەن اسپايتىن مەكتەپتەر ءداستۇرلى وقىتۋ فورماتىنا وتۋىنە رۇحسات.