"يران مەن جۇڭگو اراسىندا جاسالعان جانە ۇزاق ۋاقىت بويى تالقىلانعان ساۋدا، ينۆەستيسيا جانە قورعانىس كەلىسىمشارتى تەگەرانعا تىنىستاپ الۋعا مۇمكىندىك بەرەدى" دەپ حابارلادى The Independent باسىلىمى.

يران امەريكانىڭ يادرولىق كەلىسىم تۋرالى قىسىم جاساۋىنا قارسى ەكەنىن اشىق بىلدىرۋدە.

ال بەيجىڭ مەن تەگەران 25 جىلدىق كەلىسىمشارتقا قول قويىپ، ۆاشينگتونعا ەسكەرتۋ جىبەردى.

– مامىلە ماڭىزدى. ۋاقىت تا ءدال كەزى. يران ءوزىنىڭ شيەلەنىستى جانە قيىن كەزەڭىندە دە سەرىكتەستەرى بار ەكەنىن بىلدىرۋگە تىرىسادى. سونىمەن قاتار، بۇل يراننىڭ باسقا ەلدەردى قۋىپ جەتۋگە تىرىسۋى. دەگەنمەن، بۇل يران مەن قىتايدىڭ ەرەكشە تەرەڭ جانە كەڭ قارىم-قاتىناسقا يە ەكەندىگىنىڭ بەلگىسى ەمەس، – دەيدى لوندونداعى ساراپشى جانە ەكونوميكالىق دامۋ مامانى ەسفانديار باتمانگەليدج.

ەنەرگياعا سۇرانىسى مول جانە كوروناۆيرۋستىق پاندەميادان ەكونوميكالىق تۇرعىدان قالپىنا كەلگەن جۇڭگو اقش-تىڭ سانكسيالارى يرانمەن ساۋدا-ساتتىققا كەدەرگى كەلتىرگەنىنە قاراماستان، ءقازىردىڭ وزىندە الەمدەگى كەز كەلگەن ەلگە قاراعاندا يران مۇنايىن كوبىرەك يمپورتتايدى.

يران مەن جۇڭگو جاقىندا ءۇندى مۇحيتىندا رەسەيمەن بىرلەسكەن اسكەري جاتتىعۋلار وتكىزدى. بەيجىڭ مەن تەگەران بارلاۋ ماسەلەلەرى بويىنشا بىرنەشە جىلدار بويى ىنتىماقتاستىقتا بولدى. كەيبىر اقپاراتتار تەگەران بەيجىڭگە امەريكالىق ۇشقىشسىز ۇشاقتار مەن ادامداردىڭ تىڭشىلىق جەلىلەرى تۋرالى قۇپيا اقپارات بەردى دەپ سانايدى.

يران مەن جۇڭگو اراسىنداعى ستراتەگيالىق ىنتىماقتاستىق تۋرالى كەلىسىم يسلام رەسپۋبليكاسىن بەيجىڭنىڭ "ءبىر بەلدەۋ، ءبىر جول" باستاماسىنا قوستى. ال، "ءبىر بەلدەۋ، ءبىر جول" باستاماسى – ءالەمدەگى ەڭ ءىرى ەكونوميكا بولۋعا ۇمتىلعان بەيجىڭنىڭ ونداعان مەملەكەتتەرگە ىقپالى مەن ينۆەستيسيالارىن كەڭەيتۋگە باعىتتالعان عالامدىق ينفراقۇرىلىمدىق جوبا.