ەرتەڭ، 31 ناۋرىز كۇنى نۇر-سۇلتان قالاسىنىڭ ۋاقىتى بويىنشا ساعات 17:00-دە ونلاين فورماتتا تۇركىتىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي ءسامميتى وتەدى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي facebook پاراقشاسىندا حابارلادى.
– بەيرەسمي ءسامميتتى پرەزيدەنت قاسىم-جومارت توقايەۆ اشىپ، جۇرگىزەدى. جيىنعا قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆ، تۇركيا پرەزيدەنتى رەجەپ تاييپ ەردوعان، ازەربايجان پرەزيدەنتى يلحام الييەۆ، وزبەكستان پرەزيدەنتى شاۆكات ميرزيويەۆ، قىرعىزستان پرەزيدەنتى سادىر جاپاروۆ، تۇرىكمەنستان پرەزيدەنتى گۋربانگۋلى بەردىمۇحامەدوۆ، ۆەنگريا پرەمەر-مينيسترى ۆيكتور وربان، تۇركى تىلدەس مەملەكەتتەردىڭ ىنتىماقتاستىق كەڭەسىنىڭ باس حاتشىسى باعداد امىرەيەۆ قاتىسادى، – دەپ جازدى ول.
جيىن بارىسىندا باۋىرلاس مەملەكەتتەر اراسىنداعى ساۋدا-ەكونوميكالىق، مادەني-گۋمانيتارلىق سالالار بويىنشا ىنتىماقتاستىق جانە ونى ودان ءارى دامىتۋ ماسەلەلەرى تالقىلانادى.
"سامميت قورىتىندىسى بويىنشا تۇركى ەلدەرىنىڭ مادەني قۇندىلىقتارىنا جانە كەڭەستىڭ مارتەبەسىنە قاتىستى دەكلاراسيا قابىلدانادى دەپ جوسپارلانىپ وتىر" دەلىنگەن بەرىك ءۋاليدىڭ جازباسىندا.
پىكىر قالدىرۋ