قازاقستاننىڭ "قىزىل" ايماعىنداعى وڭىرلەردە ساباق 3-توقسانداعىداي فورماتتا جالعاسادى. بۇل تۋرالى ءبىلىم جانە عىلىم ۆيسە-مينيسترى شولپان كارينوۆا مينيسترلىكتىڭ اپپارات جينالىسىندا مالىمدەدى.

– 1 ساۋىردە 4-توقسان باستالادى. 4-توقساندا ادەتتەگىدەي وقۋشى سانى 300-گە دەيىنگى مەكتەپتەردە ءبىر سىنىپتا وقۋشى سانى 25 بالا جيناقتالىپ، شتاتتىق رەجيمدە وقۋ جالعاستىرىلادى. سونىمەن قاتار 4-توقسانعا ەنگىزىلىپ وتىرعان جاڭا فورمات – جاسىل جانە سارى ايماقتا، ياعني تاۋەكەلى تومەن جانە ورتاشا دەڭگەيدەگى وڭىرلەردە ارالاس وقىتۋ بارلىق سىنىپتار ءۇشىن ۇسىنىلادى، – دەدى شولپان كارينوۆا.

ۆيسە-مينيستر بۇل جاعدايدا ءبىرقاتار ماسەلەگە نازار اۋدارۋ قاجەتتىگىن ەسكە سالدى.

– ءبىرىنشى – كارانتين تالاپتارى قاتاڭ ورىندالۋى كەرەك. ءبىلىم باسقارمالارى جانە ءار مەكتەپتىڭ اكىمشىلىگى ءتيىستى سانيتارلىق تالاپتاردى ساقتاۋ بويىنشا تولىق جۇمىس جۇرگىزۋى قاجەت. ەكىنشىدەن، الەۋمەتتىك اراقاشىقتىق  ساقتاۋ جانە وقۋشىلار مەن پەداگوگتاردىڭ جەكە گيگيەناسىن ساقتاۋ ماسەلەلەرىن ەسكەرۋ كەرەك. وقۋشىلار اۋىرعان جاعدايدا نە ناۋقاستارمەن بايلانىستا بولعاندا جانە اتا-انانىڭ وتىنىشىنە بايلانىستى قاشىقتان وقىتۋ مۇمكىندىگى ساقتالادى، – دەدى ول.

شولپان كارينوۆا مەكتەپ اسحانالارىنىڭ جۇمىس ىستەۋى جەرگىلىكتى سانيتار دارىگەرلەرمەن بىرىگىپ شەشىلۋى كەرەكتىگىن اتاپ ايتتى. 

– نەگىزگى پاندەر شتاتتىق رەجيمدە وقىتىلادى. ال مۋزىكا، ەڭبەك، ينفورماتيكا، قۇقىق نەگىزدەرى، گرافيكا جانە جوبالاۋ، كاسىپكەرلىك نەگىزدەرى سەكىلدى پاندەر قاشىقتان وقىتىلادى. ءاربىر سىنىپتا 15 بالادان اسپاۋعا ءتيىس، ال ساباقتاردىڭ ۇزاقتىعى 40 مينۋتقا سوزىلادى.

قازىرگى ۋاقىتتا "قىزىل" ايماقتاعى وڭىرلەردە ساباق 3-توقسانداعىداي فورماتتا جالعاسادى. دەمەك، 1-5 جانە 9 بەن 11 سىنىپتاردا ارالاس وقىتۋ فورماتى قولدانىلادى. ال باسقا سىنىپتار قاشىقتان وقي بەرەدى، – دەدى ۆيسە-مينيستر.